Գերադասում եմ լինել ռուսական «ագենտ», քան դառնալ Թուրքիայի շունը. ԶԱՐՄԱՆՔ

Փաշինյանի նախկին զուգընկերուհի ԱՆՆԱ ՀԱԿՈԲՅԱՆԸ կառավարական առանձնատնից հեռանալուց հետո կրկին ակտիվացել է: Սոցցանցերում տարածված կադրերում երեւում է, թե ինչպես է նա անհոգ քեֆ անում իր մտերիմ շրջապատի հետ։ Տեսանյութում նրա կողքին են նաեւ նրա դատավոր ընկերուհին՝ Նաիրա Հովսեփյանը, ինչպես նաեւ օգնականը՝ Լիլյա Բադալյանը: Տեսանյութի ֆոնին հնչում է բավականին խորհրդանշական երգ. «Ո՛չ ավել, ո՛չ պակաս՝ երազանք ես, որ կաս, երանի քեզանից սիրտս լինի անպակաս…»: Եվ հենց այս երգի տակ էլ ո՛չ ավել, ո՛չ պակաս բավականին աշխույժ տրամադրությամբ Աննան պարում ու ուրախանում է: Ժողովուրդ ջան, եթե Աննան այսքան ուրախ է Նիկոլից բաժանվելուց հետո, պատկերացնո՞ւմ եք՝ ինչ տրամադրություն կարող է լինել հանրության մեջ, եթե մի օր Նիկոլը եւս հեռանա իշխանությունից եւ վերջնականապես լքի կառավարության «դաչաները»։ Ի դեպ, նկատեցի՞ք, որ «ընտանեկան դրամա» այդպես էլ չկարողացան խաղալ ո՛չ Նիկոլը, ո՛չ Աննան: Իրենց ամուսնալուծության բեմադրությամբ նույնիսկ «Կիսաբաց լուսամուտներ» թոք շոուի չձգեցին: Քիչ մնաց, շուտով ավելի ակնհայտ կդառնա, թե իրականում ինչի՞ համար էր այս «ամուսնալուծության օպերացիան»։ Չէ որ ով-ով, բայց 2018-ի իշխանազավթման ամենաառանցքային դերակատարը՝ Հակոբյան Աննան, «հանուն ոչինչի»՝ «զադնի» դնող չէր:

Պակաս զարմանալի չէ, թե ինչ արագ են խայտառակվում որոշ վարչապետի թեկնածուներ՝ դեռ նախընտրական քարոզարշավը չսկսած: «Միասնության թեւեր»-ի վարչապետի թեկնածու, նախկին ՄԻՊ ԱՐՄԱՆ ԹԱԹՈՅԱՆՆ ամենագիտունիկի դեմքի արտահայտությամբ ահազանգում էր, թե իբր 2025 թ.-ի ընթացքում Ադրբեջանի զինված ուժերը ՀՀ ինքնիշխան տարածքում տեղակայել են նոր դիրք։ Թաթոյանի «թեւիկներն» էլ ոգեւորված իրենց առաջնորդի «աղմկոտ բացահայտմամբ»՝ «կուռաժիտ» էին լինում. «Սուրեն Պապիկյանը նույն էնտուզիազմով, ինչ կարկանդակ էր ուտում, թող փորձի փաստերով հերքել մեր ներկայացրած ապացույցները»: Բայց անգամ հերթը Պապիկյանին էլ չհասավ, ՊՆ մամուլի խոսնակ Արամ Թորոսյանը շատ հանգիստ, փաստերով ներկայացրեց, որ Թաթոյանն ուղղակի ստում է: «Շրջանառվող կեղծ տեղեկություններն ուղեկցվում են նաեւ «Google Earth» ծրագրային ապահովման տիեզերալուսանկարներով, որոնց կապակցումը իրականության հետ ունի շեղումներ, իսկ վրայի սահմանագիծը չունի իրավական հիմք։ Այս մասին նաեւ «Google Earth» ծրագիրն է տեղեկացնում իր ընթերցողներին կամ այն մարդկանց, ովքեր օգտագործում են այդ ծրագիրը», -նշել է Թորոսյանը։ Անդրադառնալով այն մտահոգություններին, որ նշված դիրքը կարող է վտանգ ներկայացնել Սոթքի հանքավայրի, Կութ բնակավայրի եւ դրան հարակից տարածքների համար, Թորոսյանը նշել է, որ այդ դիրքը Սոթքի հանքավայրից հեռու է 4 կմ է, իսկ Կութ բնակավայրից` 6.4 կմ։ Ավելին, Կութ բնակավայրի եւ նշված դիրքի միջեւ տեսանելիություն հնարավոր չէ, քանի որ առկա է Կատար լեռը` 3008․5 մ բարձրությամբ։ Այսքանից հետո՝ հռետորական հարց է առաջանում՝ ուրիշներին «գործակալ» ու «անհայրենիք» պիտակավորող Թաթոյանի արածն ինչի՞ է նման:

Ուշագրավ հայտարարությամբ է հանդես եկել մեր օրերի կարգին մտավորականներից գրող, հրապարակախոս ԼԵՎՈՆ ՋԱՎԱԽՅԱՆԸ: Ըստ նրա` այն, ինչ իշխանությունները բարձրաձայնում են` արեւմտյան կողմնորոշում, սուտ է, այդպիսին գոյություն չունի։ «Արեւմուտքը ամեն կերպ ՔՊ-ական իշխանություններին հորդորում է հնարավորինս գնալ զիջումների հանուն Թուրքիայի եւ Ադրբեջանի շահերի։ Արեւմուտքը մեր տարածաշրջանի կիզակետում առկա է Թուրքիայի դեմքով։ Ես գերադասում եմ լինել ռուսական «ագենտ», քան դառնալ Թուրքիայի շունը...», -ընդգծել է նա:

ԶԱՐՄԱՑԱԾ Է «ԻՐԱՎՈՒՆՔ»-Ը

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝