Անձի շուրջ համախմբվելու մոլուցքն է գերիշխում, այլ` ոչ նպատակի եւ գաղափարի. Իզաբելլա Աբգարյան

«Իրավունք»-ը  գրել  էր, որ Երեւանի ավագանու «Ազգային առաջընթաց» խմբակցություն անդամ ԻԶԱԲԵԼԼԱ ԱԲԳԱՐՅԱՆԸ, որը Երեւանի նախկին քաղաքապետ ՀայկՄարությանի թիմից էր, չի լինելու վերջինիս ստեղծած «Նոր ուժ» կուսակցության նախընտրական ցուցակում: Մինչդեռ, Աբգարյանը մեզ հետ զրույցում ընդգծեց, որ իմանալովՀայկ Մարությանի ժողովրդականությունը եւ տեսնելով ժողովրդի լայն շրջանակում նրա հանդեպ սերը` կարծում է՝ շանսեր կան խորհրդարան անցնելու:

—Սակայն` որքան, չեմ կարող ասել, քանի որ դա ճշգրիտ հաշվարկ է պահանջում: Ինչպես նաեւ այս փուլում ինչ-որ բան ասելը վաղ է, որովհետեւ դեռեւս ոչ բոլոր ուժերն են հայտարարել իրենց մասնակցության մասին:Դեռ լիարժեք ցուցակները չեն հրապարակել, որպեսզի հանրության արձագանքը պարզ եւ հասկանալի լինի: Այսինքն, շատ բան պարզ կլինի ցուցակները հրապարակելուց հետո:

—Առաջիկա շաբաթվա ընթացքում «Ազգային առաջընթաց» կուսակցության համագումարն է լինելու, մասնակցելո՞ւ եք:

—Իհարկե, կգնամ, եթե ազատ լինեմ: Կսատարեմ, կօգնեմ ընկերներիս:

—Չե՞ք կարծում, որ ավելի արդյունավետ կլիներ, եթե իրենց ընդդիմադիր հռչակած կուսակցությունները համախմբվեին եւ միասնական ճակատով մասնակցեին ընտրություններին, որպեսզի հետո չլիներ 2021-ի խորհրդարանական ընտրությունների պատկերը:

—Միանշանակ, իմ մոտեցումը հենց այդպիսին է եղել ի սկզբանե:Կարծում եմ՝ ԱԺ ընտրություններին պետք է մի քանի բլոկով գնային: Իսկ այն բլոկը, որը մասնակցել է հեղափոխությանը եւ ո՛չ նախկին է, ո՛չ ներկա է, եւ շատ լավ ներսից ճանաչում է նաեւ ՔՊ-ին, բայց գտնում է, որ այդ մարդիկ չպետք է մնան իշխանության, պետք է միավորվեին:Դա տեղի չունեցավ:

Կդժվարանամ դրա բացատրությունը տալ, սակայն որքանինքս եմ այս տարիների ընթացքում հասկացել, մեզ մոտ անձի շուրջհամախմբվելու մոլուցքն է գերիշխում, այլ ոչ նպատակի եւ գաղափարի:Մենք շատ ինդիվիդուալիստ ենք, ու մեզ դժվար է լինում զիջել, գնալ ընդհանուր գործի: Ասեմ ավելին` ես նույնիսկ իմ խմբերում միշտ տեսնում եմ, որ ուսանողներն առանձին ավելի լավ են աշխատում, քան եթե փոքր խմբերի են բաժանվում: Այսինքն, մենք այդ խնդիրն ունենք, ի տարբերություն որոշ ժողովուրդների, որոնք հենց խմբային են կարողանում գործել ու արդյունքի հասնել՝ մենք անձակենտրոն ենք:Միասին համագործակցելն ու նպատակին հասնելը մեզ մոտ բարդ գործընթաց է:

ՆԱՆԱ ՍԱՐԳՍՅԱՆ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝