«Պոլի փայտ»-երին կփոխարինեն մեկ այլ «պոլի փայտ»-երով. Գագիկ Համբարձումյան

Ինչպես երկրի գլխին ընդհանրապես, այնպես էլ ոստիկանության գլխին մասնավորապես ամպեր են կուտաված: Օրերս ոստիկանական շարքերից հեռացվեցին բարձրաստիճան պաշտոնյաներ: Ինչ է կատարվում Ներքին գործերի նախարարությունում, եւ որքանով է դա կապված վերջին կրիմինալ աղմկոտ դեպքերի եւ գալիք ընտրությունների հետ, «Իրավունք»-ը պարզեց ՀՀ նախկին փոխոստիկանապետ, գեներալ-մայոր ԳԱԳԻԿ ՀԱՄԲԱՐՁՈՒՄՅԱՆԻՑ:

— Աշխատանքից ազատվել են ոստիկանապետի տեղակալ Վարդան Վարդանյանը, պարեկային ծառայության պետ Արթուր Խուդինյանը եւ ոստիկանապետի տեղակալ Կարեն Հակոբյանը: Այս երեք բարձրաստիճան ոստիկաններին միանգամից աշխատանքից ազատելը, ըստ Ձեզ, ինչո՞վ է պայմանավորված:

— Սա ընդամենը կորակեմ որպես ներկայացում: «Պոլի փայտ»-երին կփոխարինեն մեկ այլ «պոլի փայտ»-երով:

— Պարոն գեներալ, արդյոք այս ազատումները նշանակում են, որ պարեկային ծառայությունը տապալվել է:

— Գիտեք ինչ, ոչ միայն պարեկային ծառայությունն է տապալված, այլ ողջ համակարգի աշխատանքն է տապալված: Այն ամենը, ինչ կատարվում է, խայտառակություն է: Սպանությունների քանակը նայեք: Նման բան երբեւէ չի եղել Հայաստանում: Ու հարցն այն է, որ այդ ազատումներն ամբողջովին թատրոններ են:

— Նիկոլ Փաշինյանը վերջերս հայտարարեց, որ հանցագործությունների թվերը նվազել են, սակայն, ինչպես տեսնում ենք, ողջ քաղաքը հանցագործության մեջ խրված է: Սրան ի՞նչ կասեք:

— Դուք արդեն ամեն բան ասացիք, ի՞նչ ավելացնեմ: Միայն մի հարց՝ ո՞ր օրվանից եք այդ Նիկոլ կոչեցյալի խոսքերը լուրջ ընդունում: Ախր, չեմ կարողանում հասկանալ՝ ինչպե՞ս կարելի է նրա ասածներին լուրջ վերաբերվել ու մեկնաբանել առհասարակ նրա ասածները:

— Լավ, բայց  ոստիկանապետի տեղակալների աշխատանքից հանելով՝ հարցը կլուծվի՞, թե պետք էր ավելի վերեւ գնալ ու վերեւից «մաքրելով» իջնել ներքեւ:

— Ավելի վերեւ, արդեն ինքն է: Քանի դեռ կա այդ փտած գլուխը, ներքեւի նեխած հատվածը շարունակելու է մնալ եւ նման կերպ գործել:

— Սա՞ է բարեփոխված ոստիկանությունը, երբ մենք ամեն օր սիցիլիական սերիալ հիշեցնող սցենարներ ենք տեսնում :

— Չգիտեմ, ինչպես մեկնաբանեմ մի բան, որն ակնհայտ է նույնիսկ անչափահաս երեխայի համար: Այն, ինչ կատարվում է Հայաստանի Հանրապետությունում, տեսնում են բոլորը եւ հասկանում: Ու դա հասկանալու համար ո՛չ մասնագիտական, ո՛չ էլ աշխատանքային փորձ է հարկավոր: Իրավիճակը դուրս է եկել բոլոր հնարավոր եւ անհնար վերահսկողությունից: Սա այլեւս ոչ մի կերպ հնարավոր չէ վերլուծել:

— Օրերս Հրազդան գետում հայտնաբերվեց նախկին դատախազ Տիգրան Սուքիասյանի մարմինը, եւ նմանատիպ այլ առողծվածային մահերը, կարծես, դարձել են առօրյա լրահոսի մաս: Մի քիչ շատ չեղա՞ն այս իշխանության օրոք չբացահայտված մահերը:

— Ցավոք, այդ գործի վերաբերյալ մանրամասներին չեմ տիրապետում, հետեւաբար մասնագիտական մեկնաբանություն չեմ կարող տալ: Բայց ինչո՞ւ եք զարմանում: Այն խայտառակությունը, որը տիրում է իրավական համակարգում, նման բաներ պետք է լինեն: Սրանք հազիվ եկեղեցու դեմ քրեական գործեր հարուցեն: Սրանցից սա է սպասելի:

— Ի դեպ, այսօր ոստիկանությունը պահպանում է տիրադավ հոգեւորականների անվտանգությունը, ուղեկցում է նրանց: Ու առհասարակ եկեղեցու վրա են ոստիկաններին ուղարկում...

— Այո, սա պարզ ծրագիր է, որը ակնհայտ իրականացնում է ներկայիս իշխանությունը: Ավելացնելու ոչինչ չունեմ...

— Ըստ Ձեզ` ի՞նչ դերակատարում կունենան 2026-ի ընտրություններին ոստիկանական զորքերը:

— Դերակատարումը կլինի հետեւյալը՝ իրականացնել հնարավոր բոլոր տեսակի այլանդակություններ:

— Ինչպե՞ս կմեկնաբանեք այն հանգամանքը, որ մարդկանց սոցցանցում գրառում կատարելու համար կարող են ձերբակալել եւ կալանավորել, իսկ իրական հանցագործները դրսում են: Եվ վերջապես, որքա՞ն կարելի է ոստիկանով վախեցնել քաղաքացուն:

— Սա պարզապես տեռոր է, ինչի՞ մասին է խոսքը: Սա տեռոր է թե՛ եկեղեցականների դեմ, թե՛ քաղաքացիների: Այս ամբողջ այլանդակությունը, որը մեր իրականության մեջ կատարվում է եւ տվյալ դեպքում` իրավական բնագավառում, պետք չէ խիստ մասնագետ լինել, որպեսզի հասկանալ, որ տեղի է ունենում բացահայտ խայտառակություն, եւ ամեն բան վերահսկողությունից դուրս է եկել:

— Այս խայտառակ իրականության ավարտը ե՞րբ կլինի:

— Սա կավարտվի միայն այն ժամանակ, երբ ժողովրդի համբերության բաժակը լցվի:

— Իսկ էլ ի՞նչ պետք է լինի, որ համբերության բաժակը լցվի: Ինչ ասես եղավ, բայց, միեւնույնն է, կարծես թե, այդ բաժակը չի լցվում:

— Ուրեմն՝ արժանի են նրան, ինչ ունեն: Ամեն ազգ արժանի է իր ղեկավարին: Եթե չի լցվում համբերության բաժակը, ուրեմն՝ թող վայելեն:

ՆԱՆԱ ՍԱՐԳՍՅԱՆ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝