«ԶՈՀՎԵԼ ԱՆՕԴԱՉՈՒԻ ՀԱՐՎԱԾԻՑ». ԱՆՄԱՀ ՀԵՐՈՍ ԱԼԵՆ ՍՏԵՓԱՆՅԱՆ

Փետրվարի 18-ը, Արցախյան 44-օրյա դաժան պատերազմի անմահ հերոս ԱԼԵՆ ԱՐՏՈՒՇԻ ՍՏԵՓԱՆՅԱՆԻ ծննդյան օրն է, կդառնար 25 տարեկան։ Նրա շիրիմին են այցելել հարազատներ, ընկերներ, որդեկորույս ծնողներ, ծաղիկներ խոնարհել ու խնկարկել։ Անմահ հերոսի բարեկամուհին Iravunk. com -ի Շիրակի մարզի թղթակցի հետ զրույցում պատմեց.

- Ալենը ծնվել է 2001 թվականի փետրվարի 18-ին, Գյումրիում։ Նա, դեռևս մանկուց պարապում էր տարբեր մարզաձևերով. մարմնամարզություն, թաեքվանդո, խառը մենամարտեր։ Մասնակցել է մի շարք միջազգային մրցաշարերի ու արժանացել բազմաթիվ մեդալների։ Նա առանց սպորտի չէր կարողանում պատկերացնել իր կյանքը։ Ազատ ժամանակ զբաղվում էր ֆուտբոլով։ Ալենը սովորել է Գյումրիի թիվ 27 դպրոցում, ապա ուսումը շարունակել է ԳՊՏՔ քոլեջում։ Թեև կարող էր տարկետում վերցնել, սակայն հրաժարվեց։ Նա չափազանց ընկերասեր, շատ լուրջ, հավասարակշռված ու հայրենասեր մարդ էր։ Հրաժարվեց տարկետումից ու 2019֊ի հուլիսի 11-ին մեկնեց ծառայության Արցախի Հադրութի շրջան։ Ալենին զինկոմիսարիատից չճանապարհեցին, հանգամանքների բերումով հավաքը եկեղեցու բակում էր։ Երդման արարողությունն էլ կայացավ ոչ թե զորանոցում, այլ Հադրութի եկեղեցու բակում։ 5 ամիս անց, Ալենին ուղարկեցին Հոկտեմբերյան սերժանտական դասընթացների։ 3 ամիս անց, նա վերադարձավ Հադրութի 2֊րդ զորամասի 6֊րդ վաշտ, որպես սերժանտ, դիրքի ավագ։

2020 թվականի 44֊օրյա դաժան պատերազմի հենց առաջին օրվանից, նա եղել է ամենաթեժ կետում, շատ վտանգավոր դիրքում։ Հոկտեմբերի 1֊ին, Ալենն ու ընկերները հետ էին բերել այն դիրքը, որը գրավել էր նենգ թշնամին։ Ընկել էին շրջափակման մեջ, վիրավոր վիճակում օգնել ու դուրս էր հանել իր վիրավոր ընկերներին։ Նույնիսկ հանգցրել էր անմահացած վառվող ընկերոջ մարմինը, սակայն իրեն չեն հասցրել օգնություն ցուցաբերել։ Անմահացել է հերոսաբար, հոկտեմբերի 1-ին, անօդաչուի հարվածից։ Հուղարկավորվել է Գյումրիի զինվորական պանթեոնում։

2023-ի հոկտեմբերի 1-ին, Գյումրիում, Ալենի հարազատ բակում բացվել է հիշատակը հավերժացնող հուշակոթող։

ՇՆՈՐՀԱՎՈՐ ԵՐԿՆԱՅԻՆ ԾՆՈՒՆԴԴ, ԱՆՄԱՀ ՀԵՐՈՍ: ՔՈ ՍԽՐԱՆՔՆ ԱՆՄԱՀ Է, ՔՈ ԱՆՈՒՆԸ ՄԵՐ ՍՐՏԵՐՈՒՄ...

Պատրաստեց ՀՈՎՀԱՆՆԵՍ ՍԱՐԳՍՅԱՆԸ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝