Երևանում սպանված չեչեն կնոջ հուղարկավորությունն իրականացվելու է պետական միջոցներով՝ ՀՀ-ում. հարազատները 4 ամիս է՝ չեն եկել աճյունի հետևից

Չեչնիայից ընտանեկան բռնության պատճառով Երևան փախած 23-ամյա Այշաթ Բայմուրադովայի ենթադրյալ սպանության գործով նոր մանրամասներ են ի հայտ եկել: Այս մասին հայտնում է «Ազատություն»-ը։

Դեպքից 4 ամիս անց Քննչական կոմիտեն հայտնել է՝ կնոջ սպանության մեջ կասկածվում են Ռուսաստանի երկու քաղաքացի՝ Կարինա Իմինովան և Սաիդ-Համզատ Բայսարովը։ Դեպքից ամիսներ անց իրավապահները նրանց նկատմամբ հետախուզում են հայտարարել:

Հայ և ռուս իրավապաշտպանները պնդում են՝ այս երկու քաղաքացիները կապեր ունեն Չեչնիայի գործող նախագահ Ռամզան Կադիրովի ռեժիմի հետ:

Այշաթ Բայմուրադովայի ողբերգական մահից 4 ամիս անց Քննչական կոմիտեն դեռ չի ստացել դիակի փորձաքննության պատասխանը: Կնոջ ընկերները երկու վարկած են առաջ քաշում՝ թունավորում կամ խեղդամահություն:

Ավելի քան 120 օր է՝ Բայմուրադովայի մարմինը գտնվում է Երևանի դիահերձարաններից մեկում: Հայաստանի իրավապահները երկու անգամ դիմել են Ռուսաստանի Դաշնություն՝ հարազատներին տեղեկացնելու համար, սակայն մինչ այժմ ոչ ոք չի ներկայացել աճյունը տանելու: Քննչական կոմիտեից «Ազատությանը» փոխանցել են՝ Բայմուրադովայի հուղարկավորությունն իրականացվելու է պետության միջոցների հաշվին՝ օրենքով սահմանված կարգով Հայաստանում։ Բայց երբ՝ քննիչը դեռ չի որոշել:

Այշաթ Բայմուրադովայի ընկերուհին ավելի վաղ BBC News-ին ասել էր՝ Այշաթն իրեն պատմել է, որ ընտանիքն ազգակցական կապ ունի Չեչնիայի նախկին նախագահ Ահմադ Կադիրովի հետ։ «Важные истории»-ի տելեգրամյան ալիքի տվյալներով՝ նրա հայրը նախկինում ոստիկանության օպերատիվ աշխատակից է եղել, իսկ հորեղբայրը ծառայում է Չեչնիայի ոստիկանությունում։ Ամուսինն էլ Չեչնիայի ներկայիս նախագահ Ռամզան Կադիրովի մարզչի ընկերն է:

20 տարեկանում ծնողները հարկադրաբար ամուսնացրել են Այշաթին, նա մեկ տղա երեխա ունի: Ընկերները Ռուսաստանից դուրս գործող լրատվամիջոցներին պատմել են՝ նրան բռնության են ենթարկել ոչ միայն պապը, հայրը, այլև ամուսինը:

Ռուսական «Դոժդ» ինտերնետային հեռուստաընկերությունը հրապարակել էր Այշաթի ձայնային հաղորդագրություններից մի քանիսը, որտեղ նա պատմում է, թե ինչպես է ամուսինն իրեն դաժան ծեծի ենթարկել, կողպել սենյակում ու տեսախցիկների միջոցով հետևել շարժին. «Աղաչում էի նրան, կարճ ասած, որ ինձ հանգիստ թողներ, իսկ նա երկու ժամ շարունակ ստորացնում էր ինձ, թե ես զզվելի եմ, անպիտան եմ, ես եմ մեղավոր։ Խփում էր գլխիս ու ասում, որ դա իմ մեղքն է։ Մեղքի զգացում ունեի միայն երեխայիս առջև, որ նրան լույս աշխարհ եմ բերել»։

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝