Ինչ է հայտնաբերվել 42-ամյա գյումրեցու տանը

Քրեական ոստիկանության Շիրակի մարզային վարչությունում ստացված օպերատիվ տեղեկության համաձայն՝ Գյումրի քաղաքի 42-ամյա բնակիչը ապօրինի զենք-զինամթերք էր պահում: Նախաձեռնված քրեական վարույթի շրջանակում կատարված զննությամբ 42-ամյա տղամարդու՝ Ղարիբջանյան փողոցում գտնվող տանը հայտնաբերվել է որսորդական հրացան, որը, ըստ տանտիրոջ՝ պատկանել է հանգուցյալ հորը: Կատարվում է նախաքննություն։

«ԶԻՆԱՆՈՑ»՝ ՋԱՆՖԻԴԱ ԳՅՈՒՂԻ ՆԿՈՒՂՆԵՐԻՑ ՄԵԿՈՒՄ

Համայնքային ոստիկանության Արմավիրի բաժնում օպերատիվ տեղեկություններ էին ստացվել, որ Ջանֆիդա գյուղի 46-ամյա բնակիչը տանը ապօրինի զենք-զինամթերք է պահում, ինչպես նաեւ պահում եւ օգտագործում է թմրամիջոց: Նախաձեռնվել է քրեական վարույթ: Դատարանի որոշմամբ կատարված խուզարկությամբ 46-ամյա տղամարդու տան նկուղում հայտնաբերվել են նռնակ՝ իր պայթուցիչով, գնդացիրի եւ ինքնաձիգի 113 փամփուշտ, սվին-դանակ, ազդանշանային հրթիռանետիչ, գիշերային դիտարկման հեռադիտակ, մեկփողանի ողորկափող հրացան եւ նետողական զենք: Միաժամանակ, նրա տիրապետության տակ գտնվող տներից մեկի նկուղում հայտնաբերվել են մեկփողանի ողորկափող որսորդական հրացան եւ ինքնաձիգի փամփուշտ։ Ջանֆիդա գյուղի բնակիչ 46-ամյա տղամարդը ձերբակալվել եւ տեղափոխվել է ձերբակալվածների պահման վայր:

ԻՆՉՈՒ 60-ԱՄՅԱ ՏՂԱՄԱՐԴԸ ՀԱՅՏՆՎԵՑ ԱՆԱԶԱՏՈՒԹՅԱՆ ՄԵՋ

Համայնքային ոստիկանության Արմավիրի բաժնի ծառայողները օպերատիվ տեղեկություններ էին ստացնել, որ Արմավիրի մարզի Նալբանդյան գյուղի 60-ամյա բնակիչը ապօրինի զենք-զինամթերք է պահում: Կազմված փաստաթղթերն ուղարկվել են նախաքննական մարմին: Նախաձեռնվել է քրեական վարույթ, որի շրջանակում կատարված զննությամբ 60-ամյա տղամարդու տանը՝ մետաղյա պահարում, հայտնաբերել են կռփազենք, 5,45 մմ տրամաչափի ինքնաձիգի 45 փամփուշտ, սվին-դանակներ, հակագազեր, հեռադիտակ:

ԻՆՉՈՎ  ԷՐ ԶԲԱՂՎԱԾ  ԿԵՆՏՐՈՆԻ 36-ԱՄՅԱ  ԲՆԱԿԻՉԸ

Համայնքային ոստիկանության Մաշտոցի բաժնի ծառայողները օպերատիվ տեղեկություններ էին ստացել, որ Երեւանի 36-ամյա բնակիչը պահում եւ օգտագործում է թմրամիջոց։ Նախաձեռնված քրեական վարույթի շրջանակում կատարված զննությամբ 36-ամյա տղամարդու՝ Սիլիկյան թաղամասում գտնվող տանը հայտնաբերվել է 250,49 գրամ մարիխուանա տեսակի թմրամիջոց։

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝