Մի՞թե Մանուկյանն ակնկալում էր, որ Բաքվի դատարանն արդարացման դատավճիռ է կայացնելու. ԶԱՐՄԱՆՔ

Նոր որակի համախմբման կոչով է հանդես եկել ԱԺՄ նախագահ ՎԱԶԳԵՆ ՄԱՆՈՒԿՅԱՆԸ՝ պայքարել Բաքվի դատարանի կողմից հայ գերիների «դատավճռի» դեմ: «Ավարտվեց Բաքվի շինծու «դատավարությունը»՝ «խաղաղության» ու «եղբայրության» զավեշտալի մրցանակաբաշխության ֆոնին…Բաքվի դատարանում փետրվարի 5-ին հրապարակված «դատավճիռը» արցախահայության ինքնորոշման իրավունքի ոչնչացման վերջին հարվածն էր, որը հարված էր նաեւ Հայաստանի Հանրապետությանը, ինչպես նաեւ իրավական ու մարդասիրական բոլոր միջազգային նորմերին։ Սա հարված է նաեւ ողջ հայ ժողովրդին եւ ազատում է Ադրբեջանի ձեռքերը հայության դեմ հետագա ագրեսիայի համար…Ես կոչ եմ անում համաշխարհային հայությանը կազմակերպվել եւ սկսել համախմբված պայքար Բաքվի այս դատավճռի դեմ թե՛ մեր երկրում եւ թե՛ այն բոլոր երկրներում, որտեղ կա հայություն՝ այդ պայքարի մեջ ներգրավելով բոլոր հայկական կառույցները եւ հատուկ կարեւորելով Հայ Առաքելական Եկեղեցու դերը, որը մեծ հեղինակություն ունի աշխարհում», - ընդգծել է Մանուկյանը: Բայց միայն անհասկանալի է, թե ինչու է հիմա Մանուկյանը համախմբման կոչ անում, մի՞թե նա ակնկալում էր, որ Բաքվի դատարանը կարող էր Արցախի ռազմաքաղաքական ղեկավարության արդարացման դատավճիռ կայացնել, որ հիմա է հիասթափված դառն իրականությունից՝ կոչ հղում համայն հայությանը:

Իսկ ՀՀ արտաքին գործերի նախարար ԱՐԱՐԱՏ ՄԻՐԶՈՅԱՆԸ հանդիպում է ունեցել ԱՄՆ պետքարտուղարի տնտեսական հարցերով տեղակալ Ջեյքոբ Հելբերգի հետ: Հանդիպմանը մասնակցել է «Էնթերփրայզ Արմենիա»-ի գլխավոր գործադիր տնօրեն Գոհար Աբաջյանը: Զրուցակիցները քննարկել են ՀՀ-ԱՄՆ ռազմավարական գործընկերության հետեւողական զարգացմանն ուղղված ընթացիկ եւ հնարավոր նոր նախաձեռնությունները։ Զրուցակիցները պատրաստակամություն են հայտնել շարունակել ակտիվ աշխատանքները բարձր տեխնոլոգիաների ոլորտում ՀՀ-ԱՄՆ համագործակցության եւ ընդհանուր առմամբ տնտեսական համագործակցության ընդլայնման ճանապարհին ներդրումների խթանման ուղղությամբ՝ հաշվի առնելով այս ոլորտներում Հայաստանում ձեւավորված փորձն ու արագ տեմպերով զարգացող միջավայրը:Այո՛, առաջին հայացքից զարմանալի ոչինչ չկա, բայց կա մի փոքրիկ նյուանս. «Էնթերփրայզ Արմենիա»-ի գլխավոր գործադիր տնօրենը արտգործնախարար Միրզոյանի կինն է: Եվ այստեղ կասկած է առաջանում՝ իրո՞ք, խոսքը Հայաստանին է վերաբերում, թե՞ Միրզոյանների ընտանիքի տնտեսական առաջընթացին: Համաձայնեք, որ լրիվ հին ու բարի ընտանեկան լոտո է` այն էլ արդեն շահած:

Ազգային ժողովում ուշագրավ հայտարարություն է արել «Քաղաքացիական պայմանագիր» խմբակցության պատգամավոր ՎԱՀԱԳՆ ԱԼԵՔՍԱՆՅԱՆԸ: Ըստ նրա` Հայաստանի Հանրապետության քաղաքացիներն «ապրում են մի երկրում, որտեղ աշխարհի տարբեր ծայրերից տասնյակ հազարավոր մարդիկ գալիս են խոպան»: Դեռ թողնենք մի կողմ, որ այս ելույթից հետո Միացյալ Նահանգներից, Եվրոպայից ու Ռուսաստանից հայ խոպանչիներին «դեպորտ» անելը լրիվ արդարացված կլիներ այդ երկրների կողմից, բայց էլ ավելի կարեւոր մի դրվագի անդրադարձել է քաղաքագետ Գագիկ Համբարյանը` արձագանքելով Ալեքսանյանին. «Ու ի՞նչ մակարդակի խոպանչիներ են գալիս...Խոպանչի էլ կա, խոպանչի էլ... Լավ կլինի դու հլը բարձրաձայնի, թե քանի ՀՀ հպարտ քաղաքացի է ձեր օրոք գնում խոպան, ձեր օրոք հրաժարվել ՀՀ հպարտ քաղաքացիությունից, ձեր օրոք ընդունել ՌԴ կամ այլ երկրի քաղաքացիություն…»:

ԶԱՐՄԱՑԱԾ Է «ԻՐԱՎՈՒՆՔ»-Ը 

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝