ԿԱՊԻՏԱՆ ՍՈՍ ԷԼԲԱԿՅԱՆԸ ԿԴԱՌՆԱՐ 34 ՏԱՐԵԿԱՆ

Հունվարի 31-ը, ՀՀ ԶՈւ կապիտան, հրետանու շտաբի պետ, 2020 թվականի հուլիսյան մարտերում հերոսացած ՍՈՍ ՓԱՅԼԱԿԻ ԷԼԲԱԿՅԱՆԻ ծննդյան օրն է, կդառնար 34 տարեկան։ Նա ծնունդով Շիրակի մարզի Ախուրյան համայնքի Մարմաշեն գյուղից էր։ Անմահ հերոսի հուշարձանին են այցելել ծաղիկներ խոնարհել ու խնկարկել, Մարմաշենի վարչական ղեկավար Սասուն Եղոյանը, Մարմաշենի «Մուրադ Մալխասյանի» անվան արվեստի դպրոցի տնօրեն Սուրեն Սամվելյանը, հարազատներ, ընկերներ, համագյուղացիներ։

Անմահ հերոսի բարեկամուհին, Iravunk. com - ի Շիրակի մարզի թղթակցի հետ զրույցում նշեց. «Սոսը ծնվել է 1992 թվականի հունվարի 31-ին, Մարմաշեն գյուղում, Հայոց Բանակի կազմավորումից 3 օր անց, իսկ նրա զոհվելուց 3 ամիս անց էլ հայկական բանակը ծանր վիրավորում ստացավ, սկսվեց Արցախյան 44֊օրյա դաժան պատերազմը։ Սոսն իր կյանքի լավագույն տարիները նվիրեց հայրենի երկրի պաշտպանությանը, որպես արժանավոր սպա արեց հնարավորն ու անհնարինը, Հայկական բանակի հզորացման համար, զոհվեց հանուն հայրենիքի, հաղթանակած, պարտություն չտեսած։ Սոսի համար երեխաները մի ուրիշ աշխարհ ու մեծ արժեք էին, սիրում էր ծանոթ ու անծանոթ բոլոր փոքրիկներին, երազում էր աղջիկ ունենալ։ Այդպես էլ ցավոք սրտի երեխա ունենալ չհասցրեց, սակայն հասցրեց կյանքի գնով պաշտպանել հայրենի հողը, որ իր սիրելի մանուկները անհոգ ու խաղաղ ապրեն։ 2020֊ի հուլիսի 12-ին հակառակորդը փորձել է գրավել Հայաստանի հյուսիս ֊արևելյան հատվածում տեղակայված մարտական դիրքը, սակայն անձնակազմի գրագետ աշխատանքի արդյունքում հետ է շպրտվել, կրելով մեծաթիվ մարդկային ծանր կորուստներ։

Կապիտան Սոս Էլբակյանը, մայոր Գարուշ Համբարձումյանի հետ միասին, 2020֊ի հուլիսի 14֊ին, ժամը 01։30-ի սահմաններում, իջել են զինամթերքի պահեստ, որպեսզի համապատասխան զինամթերք հասցնեն զորքին, ցավոք հենց այդ պահին էլ նենգ թշնամու անօդաչու թռչող սարքը հայտնաբերել է նրանց գտնվելու վայրը ու թիրախային հարված հասցրել, զինվորներից երկուսը եղել են զինապահեստում, մյուս երկուսը մեքենայի մեջ։

2020-ի օգոստոսին, Տավուշի մարզի Այգեձոր համայնքում կապիտան Սոս Էլբակյանի հիշատակին տեղադրվել է հուշաքար։ Հետմահու արժանացել է «Արիության համար» և «Անբասիր ծառայության համար 1֊ին աստիճանի» մեդալի։ Ծննդավայրի Մարմաշեն գյուղի կենտրոնական փողոցը անվանակոչվել է Սոս Էլբակյանի անվամբ։

ՇՆՈՐՀԱՎՈՐ ԵՐԿՆԱՅԻՆ ԾՆՈՒՆԴԴ, ԱՆՄԱՀ ՀԵՐՈՍ ։ՔՈ ՍԽՐԱՆՔՆ ԱՆՄԱՀ Է, ՔՈ ԱՆՈՒՆԸ ՄԵՐ ՍՐՏԵՐՈՒՄ...

Պատրաստեց ՀՈՎՀԱՆՆԵՍ ՍԱՐԳՍՅԱՆԸ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝