«ԼԻՆԵԼՈՎ ՇԱՏ ԾԱՆՐ ՎԻՐԱՎՈՐ, ՓՈՐՁԵԼ Է ԴԻՄԱԿԱՅԵԼ ԹՇՆԱՄՈՒՆ, ԶՈՀՎԵԼ ՀԵՐՈՍԱԲԱՐ». ԱՆՄԱՀ ՀԵՐՈՍ ԱՐԱՄ ԹՈՐՈՍՅԱՆ

Հասարակություն 31 Հունվար, 2026 16:20

Iravunk. com -ը շարունակում է անդրադառնալ մեր անմահ Հերոսներին, ովքեր ամենաթանկը իրենց ջահել կյանքը տվեցին հանուն մեզ բոլորիս 2020 թվականի Արցախյան 44-օրյա ահաբեկչական պատերազմի ժամանակ։Նրանցից մեկն էլ ԱՐԱՄ ՏԱՐՈՆԻ ԹՈՐՈՍՅԱՆՆ էր։ Անմահ հերոսի հորաքույրը տիկին ԱԻԴԱ ԹՈՐՈՍՅԱՆԸ, Iravunk. com -ի հետ զրույցում, խորը ցավը սրտում պատմեց.

«Արամը ծնվել է 2002 թվականի հունվարի 19-ին, Երևանում ։Գերազանցությամբ ավարտել է դպրոցը և 2020-ի հուլիսի 3-ին Սուրբ Թերեզայի անվան բժշկական համալսարանի երկրորդ կուրսն ավարտելուց հետո զորակոչվել է Հայոց բանակ։ Ծառայում էր Արցախում, Հադրութի զորամասում։ 44-օրյա դաժան պատերազմի հենց սկզբից մինչև վերջին օրը, անձնվիրաբար մասնակցել է Արցախյան գոյամարտին։ Սկզբից կռվել է Հադրութում, ապա ցուցաբերելով բացառիկ ուժ և խիզախություն, հրամանատարի հրամանով տեղափոխվել է Շուշի Քարինտակի թեժ մարտերին մասնակցելու։ Պատերազմի ժամանակ մեծաթիվ վիրավոր մարտական ընկերների է դուրս բերել նենգ թշնամու նշանառության տակ գտնվող հատվածից, վտանգելով իր կյանքը։ Ամենածանր օրերին տեղափոխվել է Շուշիի կենտրոն։ Նոյեմբերի 7-ի առավոտյան, բեկորային վնասվածք է ստացել ձախ ուսի հատվածում։ Ստացել է մարտը թողնելու և անհրաժեշտ բուժօգնություն ստանալու հրաման, բայց համառել է և վիրակապվելուց հետո կրկին շարունակել է իրեն վստահված դիրքի պաշտպանությունը։ Երեկոյան ստացել է ոտքի շատ ծանր հրազենային վիրավորում։ Դրանից հետո, դիրքը կրկին չթողնելով, փորձել է դիմակայել նենգ թշնամու դեմ, որից հետո մնալով շրջափակման մեջ, զոհվել է հերոսաբար։ Կյանքով լեցուն երիտասարդ էր Արամը, ուներ շատ երազանքներ, որոնք ցավոք սրտի այդպես էլ մնացին անկատար։Քանի որ Արամի համար հայրենիքի ազատությունն ու ազգի արժանապատվություն ամենաթանկն էին, նա գերադասեց հերոսանալ ու իր անունը ոսկե տառերով գրեց անմահ հերոսների շարքում։ Ռազմական ոգին բարձր պահելու համար, Արամը հետմահու արժանացել է «Մարշալ Բաղրամյան» և «Մարտական ծառայության» մեդալների։

ՀԱՎԵՐԺ ՓԱՌՔ ՄԵՐ ԲՈԼՈՐ ԱՆՄԱՀ ՀԵՐՈՍՆԵՐԻՆ...

Պատրաստեց ՀՈՎՀԱՆՆԵՍ ՍԱՐԳՍՅԱՆԸ