«ԿԱՏԱՂԻ ՄԱՐՏԻ Է ԴՈՒՐՍ ԵԿԵԼ ԻՐԵՆՑԻՑ ԲԱԶՄԱԿԻ ԱՆԳԱՄ ՇԱՏ ՀԱԿԱՌԱԿՈՐԴԻ ԴԵՄ». ԱՆՄԱՀ ՀԵՐՈՍ ՀԱՄԼԵՏ ԲԱԴԱԼՅԱՆ։

Հունվարի 28-ն է, Հայոց Բանակի կազմավորման 34 - ամյակը։ Այս առիթով, Iravunk. com -ը անդրադառնում է մեր հայրենիքի պաշտպաններին, անմահ Հերոսներին, ովքեր ամենաթանկը, իրենց ջահել կյանքը չխնայեցին հանուն մեզ, հանուն այս օրվա, զոհվելով 2020 թվականի Արցախյան 44-օրյա դաժան պատերազմում։ Նրանցից մեկն էլ շարքային ՀԱՄԼԵՏ ԳԱԳԻԿԻ ԲԱԴԱԼՅԱՆՆ էր։ Նրա շիրիմին են այցելել հարազատներ, ընկերներ, ծաղիկներ խոնարհել ու խնկարկել։ Անմահ հերոսի մայրը, տիկին ԿԱՐԻՆԵ ՄԱԹԵՎՈՍՅԱՆԸ, Iravunk. com -ի հետ զրույցում, խորը ցավը սրտում նշեց.

«Համլետս ծնվել է 2001 թվականի ապրիլի 19-ին, Երևանում, ստացել միջնակարգ կրթություն։ Զինվորական ծառայության է անցել Մուղնու զորամասում, որտեղ տիրապետել է «իգլա» զինատեսակին։ 2019֊ի հոկտեմբերի 25֊ին տեղափոխվել է Մեղրի, Ագարակի զորամաս, նշանակվել զենիթահար։ Ծառայողական պարտականությունները կատարել է ճիշտ, ժամանակին ու պատշաճ մակարդակով։ Զինվորական կոլեկտիվում ցուցաբերել է ընկերասիրություն, գթասրտություն։ Բնավորությամբ զուսպ էր, հավասարակշռված, պահպանել է զինվորական բարեկրթության կանոնները։ Որդիս շատ մեծ պատիվ էր համարում կրել զինվորական համազգեստը, մշտապես կոկիկ, մաքուր, հարդարված վիճակում, ֆիզիկապես առողջ էր։ Մասնակցել է չարաբաստիկ 2020 թվականի Արցախյան 44-օրյա դաժան պատերազմին։ Հոկտեմբերի 2֊ից մինչև 12֊ը, քաջաբար մարտնչել է Ջրականի շրջանում, ապա հոկտեմբերի 21֊ից մինչև նոյեմբերի 1֊ը, մարտը շարունակել է Նռնաձորի շրջանում։ Մարտնչել է Նռնաձորի 44 մարտական դիրքում։Նոյեմբերի 1-ին, իր զինակից ընկերների հետ կատաղի մարտի է դուրս եկել իրենցից բազմակի անգամ շատ հակառակորդի դեմ։ Չցանկանալով կատարել նահանջի հրամանը, ընկերների հետ մնում է դիրքում, որպեսզի իրենց մյուս ընկերներին կարողանան դուրս բերել շրջափակումից։ Անմահացել է նույն օրը, նոյեմբերի 1֊ին, հայրենիքի պաշտպանի սուրբ մահով, նրա հետ անմահացել են 3 զինակից ընկերներ և 7֊ը ստացել տարբեր աստիճանի վիրավորումներ։ Որքան էլ ժամանակ անցնի, մեր ցավը մնում է ցավ ու երբեք չի սպիանում։ Երբեք չեմ կարող համակերպվել այս դառը, դաժան իրողության հետ։ Մեզ հերոս պետք չէր, մեզ մեր թանկ զավակն էր պետք»։

Շարքային Համլետ Բադալյանը, հետմահու պարգևատրվել է «Մարտական ծառայության» և «Ֆիդայնապետ Անդրանիկ» մեդալներով։

ՀԱՎԵՐԺ ՓԱՌՔ ՈՒ ԽՈՆԱՐՀՈՒՄ, ՄԵՐ ԲՈԼՈՐ ԱՆՄԱՀ ՀԵՐՈՍՆԵՐԻՆ...

Պատրաստեց ՀՈՎՀԱՆՆԵՍ ՍԱՐԳՍՅԱՆԸ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝