Չարենցավանը շոկի մեջ է. հոգեւորականի վրա գաղտնի վերակացո՞ւ են նշանակել

Չարենցավանում կրքերը չեն հանդարտվում․քաղաքը շարունակում է քննարկել տեղի Սուրբ փրկիչ եկեղեցու հոգեւոր հովիվ ՏԵՐ ՀԱՄԱԶԱՍՊ քահանա ՀԱԳԵՅԱՆԻ վարքագիծը: Հիշեցնենք՝ նախ սոցցանցերում եւ իշխանական մամուլում հայտնվեց հայտարարություն, թե վերջինս միացել է Մայր Աթոռի եւ Ամենայն Հայոց կաթողիկոսի դեմ գործող տիրադավերի նախաձեռնությանը, ապա Նիկոլ Փաշինյանի առաջ մատուցեց խեղված բովանդակությամբ պատարագ, որի ժամանակ զեղչեց Վեհափառ Հայրապետի անվան հիշատակումը:

Քաղաքում համառ լուրեր են շրջանառվում, թե Տեր Համազասպն ազգակցական կամ սերտ կապեր ունի տիրադավներից Կոտայքի թեմի առաջնորդ Առաքել արքեպիսկոպոս Քարամյանի հետ։ Ընդհուպ մինչեւ այնքան մտերիմ, որ Առաքել սրբազանին քեռի է համարում: Շատերը վստահ են, որ հենց այդ կապերն էլ չէին կարող ազդեցություն չունենալ քահանայի դիրքորոշումների ու քայլերի վրա: Այս համատեքստում, ըստ նույն աղբյուրների, Տեր Համազասպի նշանակումը հենց Չարենցավանի եկեղեցում բնավ էլ պատահական չէր։ Եկեղեցին համարվում է մարզի «չալաղաջ» եկեղեցիներից մեկը, որտեղ արարողություններ անելը բավական եկամտաբեր է:

Տեղի մեր աղբյուրները փոխանցում են նաեւ, որ Չարենցավանի հավատացյալների մի զգալի հատված սկսել է պարզապես խուսափել երբեմնի սիրելի հոգեւորականի պատարագներին մասնակցելուց: Եվ, թերեւս, ամենաաղմկահարույց տեղեկությունը․ մեր աղբյուրների պնդմամբ՝ տեղի ՔՊ-ականներից գրեթե ամեն կիրակի ներկա են լինում պատարագներին՝ վերահսկելով «գործընթացը» եւ անգամ գաղտնի տեսագրելով այն հատվածը, երբ քահանան իշխանության հրահանգով պետք է զեղչի Ամենայն Հայոց կաթողիկոսի անունը։

Ի՞նչ է իրականում տեղի ունենում Չարենցավանի եկեղեցում, արդյոք Տեր Համազասպը գտնվում է քաղաքական ճնշումների տակ, թե, իրոք, Առաքել արքեպիսկոպոսի ազգակցական կապերով պայմանավորված է ընտրել հակաեկեղեցական ուղի, «Իրավունք»-ը փորձեց պարզել հենց նրանից, սակայն մեր զանգերը մնացին անպատասխան: Ինչպես կասեր նախկին պատգամավոր Նաիրա Զոհրաբյանը, տպավորություն է, որ հոգեւորականին ուղիղ ասված է. «Համազա՛սպ, մի քիչ զուսպ եղեք...»:

ՀՐԱՆՏ ՍԱՐԱՖՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝