Մեզ նման հին ազգին, երբ փորձում են վնասել, դրանից ազգային ինքնությունն ավելի է ամրանում. Ծատուրյան

«Իրավունք TV»-ի տաղավարում հոգեբան ԻՐԻՆԱ ԾԱՏՈՒՐՅԱՆԸ, անդրադառնալով Հայ Առաքելական Սուրբ եկեղեցու եւ հոգեւորականների դեմ իրականացվող արդեն տեւական ժամանակ ընթացող կազմակերպված արշավին, փաստեց, որ վերջին տարիներին մեր ոգեղեն արժեքները հայտնվել են կատակլիզմային իրավիճակում:

— Որպեսզի առաջին դասարանցի երեխան տեսնի Մեսրոպ Մաշտոցի նկարը, պետք է մտնի հատուկ ծրագրով՝ QR-կոդով: Նարեկացու «Մատյան ողբերգություն» սովորում էին 8-9 դասարաններում, իսկ հիմա մտցրել են Ֆրանց Կաֆկա՝ մի հեղինակի, ով մահանալուց առաջ կտակել էր իր գործերն այրել, բայց նրա ընկերը, ով հասկացել էր, որ այդ գործերից հնարավոր է մեծ գումար վաստակել, հրապարակել է Կաֆկայի աշխատությունները ու աշխարհով մեկ տարածել: Դա խիստ վնասակար, հիվանդություն առաջացնող գրականություն է, որը կարելի է կարդալ միայն 30 տարեկանից հետո, այն էլ` նախապես հոգեբանորեն պատրաստ լինելով: Այս ամենը հաշվի առնելով՝ պարզ է դառնում, որ եկել հասել ենք այն օրվան, որ կաթողիկոսի դեմ քայլեր են ձեռնարկում` ոչ թե նրա անձի դեմ լինելով, այլ ցանկանում են դրանով թուլացնել մեր հիմքը, արմատը:

Հիշում եմ՝ ինչպես էր հայրս պատմում, որ Չարենցի անվան դպրոցի տեղը եղել է եկեղեցի եւ Խորհրդային ժամանակաշրջանում՝ 1936-37 թթ. այն քանդել են: Այս մասին հիշելով` անգամ կարող եմ հուզվել: Այսօրվա վիճակը իմ մեջ արթնացնում է հորս պատմածը: Սակայն հետաքրքիրն այն է, որ քանդելով եկեղեցին` կառուցել են դպրոց, գոնե, իսկ հիմա՞...
Պարադոքս է նաեւ այն, որ մեզ նման հին ազգին, երբ փորձում են վնասել, դրանից ազգային ինքնությունն ավելի է ամրանում: Այստեղ մեր մեջ արթնանում է ազգայինը պահելու գերնպատակը: Այս Նոր տարին ես, ինչպես միշտ եմ անում, դիմավորեցի Սուրբ Զորավոր եկեղեցում, եւ հուրախություն բոլորիս՝ պետք է ասեմ, որ կանգնելու տեղ անգամ չկար: Այնքան մարդ էր եկել եկեղեցի, որ ես մի կերպ կարողացա առաջանալ: Մենք պետք է ամեն օր, ամեն գնով պաշտպանենք մեր եկեղեցին, մեր արժեքներն ու հավատքը:

ՆԱՆԱ ՍԱՐԳՍՅԱՆ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝