ՀՐԱՏԱՊ. Օգտատիրոջ հեռախոսահամարին գալիս է զանգ ու այլեւս կանխելն անհնար է. Ինչ է կատարվում այս պահին WhatsApp-ում

Վերջին օրերին ի հայտ է եկել WhatsApp-ի հաշիվների գողության չափազանց վտանգավոր նոր մեթոդ, որի դեպքում օգտատերը կարող է կորցնել իր հաշիվը նույնիսկ առանց որևէ խոսակցության։
Սխեման գործում է շատ արագ և աննկատ։ Օգտատիրոջ հեռախոսահամարին գալիս է զանգ, որի ընթացքում ոչ ոք չի խոսում կամ զանգը մի քանի վայրկյանում անջատվում է։ Այդ պահին խաբեբաները փորձում են նույնականացնել WhatsApp հաշիվը այլ սարքում,- այս մասին «Իրավունքի» հետ զրույցում ասաց հայտնի տեղեկատվական անվտանգության մասնագետ Արսեն Լեվոնյանը, մանրամասնելով.

- Եթե նույն ժամանակ օգտատիրոջ հեռախոսին գալիս է հաստատման կոդ, և գործընթացը հաջողվում է, հաշիվը կարող է անցնել գողացողի վերահսկողության տակ՝ բառացիորեն րոպեների ընթացքում։
Շատ դեպքերում օգտատերը նույնիսկ չի հասկանում, թե ինչ է տեղի ունեցել։ WhatsApp-ը պարզապես դուրս է գալիս հաշվից, իսկ մուտք գործելը դառնում է անհնար։ Արդյունքում՝ կորում են նամակները և կոնտակտների վստահությունը, գողացված հաշիվը սկսում է օգտագործվել այլ մարդկանց խաբելու համար, ընկերներն ու հարազատները կարող են ստանալ կեղծ հաղորդագրություններ ։
Այս ամենը ցույց է տալիս, որ WhatsApp-ում անվտանգության խնդիրը դարձել է շատ լուրջ, և հաշիվը կարող է վտանգվել նույնիսկ այն դեպքում, երբ օգտատերը ոչ մի կոդ չի փոխանցել և ոչ մեկի հետ չի խոսել։

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝