Ռուսներին փորձում են գցել խառնաշփոթի մեջ. Ղուկասյանը բացահայտել է Նիկոլ-Քոչարյան սցենարը

ԴՕԿ կուսակցության պատվավոր նախագահ ՎԱՐԴԱՆ ՂՈՒԿԱՍՅԱՆԸ հերթական կոշտ հայտարարություններով է հանդես եկել՝ անդրադառնալով ՀՀ երկրորդ նախագահ Ռոբերտ Քոչարյանի քաղաքական վարքագծին, նրա՝ ռուսական ուղղությամբ տարվող փակ բանակցություններին եւ ընդդիմադիր դաշտում ընթացող կուլիսային ինտրիգներին։

Ղուկասյանի խոսքով՝ երկրորդ նախագահն այսօր զբաղված է ոչ թե իշխանափոխության օրակարգով, այլ սեփական քաղաքական ազդեցության պահպանմամբ՝ դրանով իսկ փաստացի աշխատելով Նիկոլ Փաշինյանի վերարտադրության օգտին։ Նրա համոզմամբ՝ ընդդիմադիր դաշտում մրցակիցներին թուլացնելու այս քաղաքականությունն ուղիղ սպասարկում է գործող իշխանության շահերը։

ԴՕԿ կուսակցության առաջնորդը հայտարարում է, որ իր ձեռքում կան տեղեկություններ այն մասին, թե ինչպես է Ռոբերտ Քոչարյանի թիմը «ընկել ռուսների դռները»՝ փորձելով հասկանալ, թե ինչ մեխանիզմներով կարելի է չեզոքացնել Վարդան Ղուկասյանի քաղաքական ակտիվությունը։

«Նրանք ուզում են այնպես անել, որ իմ գլուխն ուտեն, հանկարծ ռուսական հող ոտք չդնեմ։ Ընտրություններին էլ Նիկոլի հետ ձայները կիսեն, որ հիմա էլ Հայաստանը հանձնեն»,– հայտարարում է Ղուկասյանը՝ ընդգծելով, որ նրանց քաղաքական հաշվարկի վերջնանպատակը հենց սա է։

Նրա խոսքով՝ ընդդիմության ներսում նման վարքագիծը վաղուց արդեն բացահայտ է. «Հետո էլ նույն մարդիկ հարցնում են՝ ո՞վ է Նիկոլին պահում աթոռին»,– ընդգծում է նա։

Առանձնահատուկ տեղ են զբաղեցնում Ղուկասյանի հայտարարությունները Ռոբերտ Քոչարյանի՝ ռուսական շրջանակների հետ շփումների վերաբերյալ։ Ըստ ԴՕԿ կուսակցության պատվավոր նախագահի՝ Քոչարյանը փորձում է տարածաշրջանի պատասխանատու Ռուսաստանի հետ պայմանավորվածություններ ձեռք բերել եւ ընդդիմադիր դաշտը պահել իր վերահսկողության տակ։

«Նրանց թվում է, թե ես չեմ իմանալու, բայց ամեն ինչ պարզ է», - նշում է Ղուկասյանը։

Նա նաեւ պնդում է, որ ցանկություն ունի ԱՄՆ-ից էքստրադիցիայի ենթարկվել Ռուսաստան՝ հաշվի առնելով իր ՌԴ քաղաքացիությունը, սակայն այդ գործընթացը, ըստ նրա, խոչընդոտվում է հենց Ռոբերտ Քոչարյանի կողմից՝ վերջինիս ռուսական կապերի միջոցով։

Ըստ էության, Քոչարյանը հասկանում է, որ Վարդան Ղուկասյանի հայտնվելը Ռուսաստանում կարող է լուրջ մրցակցություն ստեղծել ռուսական քաղաքական շրջանակների հետ շփումներում, ինչն էլ ստիպում է երկրորդ նախագահին մեդիա եւ սոցիալական ցանցերի միջոցով խառնաշփոթ ստեղծել՝ ռուսական կողմի մոտ ԴՕԿ կուսակցության առաջնորդի հարցը փակելու համար։

Ստացվում է, որ Ռոբերտ Քոչարյանը պարզապես վախենում է կորցնել իր «մենաշնորհը» ռուսական ուղղությամբ, որպեսզի կարողանա շարունակել Նիկոլ Փաշինյանի «գլխավոր ընդդիմադիր» թատերական ներկայացումը։ Մինչդեռ իրականում հենց Ռոբերտ Քոչարյանն է խանգարում բոլոր ընդդիմադիրներին եւ դրանով ուղղակիորեն նպաստում գործող իշխանության վերարտադրմանը։

Ի դեպ, Վարդան Ղուկասյանը նաեւ հավելել է. «Մի քանի հոգու կաշառել եք, ինձ դեռ պահում են փակի տակ։ Ասում եմ՝ դուռը բացեք, գնում եմ երրորդ երկիր, ասում են՝ չէ, պիտի մնաս Ամերիկայում։ Նաջարյանը փոշմանել է։ Ա՜յ քեզ բան։ Բայց վաղ թե ուշ դուռը բացվելու է»։

Այս հայտարարություններով Վարդան Ղուկասյանը փաստացի բացում է ընդդիմադիր դաշտում գործող այն մեխանիզմների վարագույրը, որոնք, ըստ նրա, վերջին տարիներին թույլ են տվել որոշ գործիչների ներկայանալ որպես «այլընտրանք», սակայն իրականում սպասարկել են գործող իշխանության շահերը։ Ղուկասյանի գնահատմամբ՝ այսօր ընդդիմադիր դաշտում ամենամեծ խնդիրը ոչ թե Նիկոլ Փաշինյանն է, այլ այն մարդիկ, ովքեր նրա իշխանության համար ապահովում են հարմարավետ «ընդդիմադիր» միջավայր՝ կուլիսային պայմանավորվածություններով եւ արտաքին ուղղություններով մենաշնորհի ձգտմամբ։ Իսկ թե ով է իրականում խանգարում իշխանափոխությանը եւ ով է պահում Նիկոլ Փաշինյանին քաղաքական կյանքում, ըստ ԴՕԿ կուսակցության պատվավոր նախագահի, վաղ թե ուշ հանրության համար դառնալու է առավել քան ակնհայտ։

ՀՐԱՆՏ ՍԱՐԱՖՅԱՆ 

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝