«2026 ԹՎԱԿԱՆԻ ԽԱՂԵՐԻ ՆԱԽԱՊԱՏՐԱՍՏՎԵԼՈՒ ՀԱՄԱՐ ԱՅԴՊԵՍ ԷԼ ՈՉ ՄԻ ՖԻՆԱՆՍԱՎՈՐՈՒՄ ՉՏՐՎԵՑ». ՀԱՅԱՍՏԱՆԻ ԴԱՀՈՒԿԱՍՊՈՐՏԻ ՖԵԴԵՐԱՑԻԱՅԻ ՆԱԽԱԳԱՀ ԳԱԳԻԿ ՍԱՐԳՍՅԱՆ

Iravunk. com -ի մարզական լրագրողը կապ է հաստատել Հայաստանի դահուկասպորտի ֆեդերացիայի նախագահ ԳԱԳԻԿ ՍԱՐԳՍՅԱՆԻ հետ։ Նա խոսել է Միքայել Միքայելյանի աղմուկ հանած միջադեպի, ԿԳՄՍ նախարար Ժաննա Անդրեասյանի արձագանքի, ինչպես նաև պետական ֆինանսավորում չստանալու, այլ խնդիրների մասին։

- Հայաստանի դահուկային սպորտի ֆեդերացիայի բոլոր մարզիկները կրում են մարզահագուստ, որոնց վրա հայերենով ավելի մեծ գրված է «Հայաստան», իսկ անգլերենով ավելի փոքր «Armenia»։ Մենք ազգային ֆեդերացիաներից առաջինն ենք, որ մրցումային հագուստի վրա հայերեն գրություն ունի։ Որտեղ է թյուրիմացությունը։ Դահուկային բոլոր ձևերում կան մրցումային համարներ, որոնք մարզիկները կրում են համազգեստի վրայից, և նշված է նաև հովանավորի անունը։ Միքայելը չի կրել «Ադրբեջան» գրությամբ մարզահագուստ, իր մարզահագուստի վրայից էլաստիկ շապիկն ունեցել է հովանավորի անունը։ Մի հետաքրքիր հանգամանք. պատահականության արդյունք է, թե այդ դեպքը հաշվի առնելու շնորհիվ է, որ հաջորդ օրը Միքայելի ստացած համարի վրա եղել է այլ հովանավորի անվանում։ Օրերս ԿԳՄՍ նախարար Ժաննա Անդրեասյանը մամուլի ասուլիսի ժամանակ անդրադարձել է այս թեմային։ Նա նշել է, որ հարցում են ուղարկել մեզ, որի պատասխանը ստանալուց հետո կհայտնեն իրենց դիրքորոշումը։ Նույն օրը հարցում ենք ստացել փոխնախարար Հասմիկ Ավագյանից ու անմիջապես պատասխանել ենք։ Նախարար Անդրեասյանը ասուլիսի ժամանակ ասել է. «Սպորտը պետք է լինի սպորտի մասին» արտահայտությունը։ Նա առավել քան իրավացի է, սպորտը պետք է լինի սպորտի մասին, դրան է նվիրված մեր կյանքի ամենամեծ մասը։ Շատ կուզեմ, որ սպորտի համակարգը մեր երկրում լինի 21-րդ դարին համապատասխան։ Հարգելի տիկին նախարար, տարիների ընթացքում բազմաթիվ նամակներ ենք գրել, բարձրաձայնել խնդիրներ, հատկապես 2026-ի Օլիմպիական խաղերի նախապատրաստական ծրագրի վերաբերյալ։Ոչինչ չի փոխվել, բացարձակ 0 արդյունք։ Փոխնախարարի այն հարցին, թե ինչ պատմական արդյունքի ենք հասել, նշել եմ, որ պարադահուկավազորդ Գարիկ Մելքոնյանը Համաշխարհային ուսանողական խաղերում նվաճել է բրոնզե մեդալ։ Այս արդյունքը գրանցվել է հավաքականի գլխավոր մարզիչ ու Միքայել Միքայելյանի հայր Արթուր Միքայելյանի ու նրա տիկնոջ Ալլա Միքայելյանի շնորհիվ։ Այն մարզչի, ով Ձեզ բազմաթիվ նամակներ է ուղարկել, ցանկանալով հանդիպել ու քննարկել դահուկային սպորտի առջև ծառացած խնդիրները։ Նա ցանկացել է ներկայացնել ձմեռային մարզաձևերում մեր բարեփոխումների տեսլականը, ցավոք այդպես էլ մնացել է անպատասխան։ Աշոցքը բարենպաստ վայր է, ցավոք, մարզադպրոց էլ չկա այնտեղ։ Մի քանի տարիների ընթացքում մի անգամ կարճ հանդիպում է եղել։ Քննարկել ենք մի ցավոտ հարց, որը շատ հեշտ լուծելի է։ Ձմեռային մարզաձևերի հավաքականները մրցումների մասնակցելու համար մի քանի տարի պետությունից որևէ մարզահագուստ չէին ստացել ու վերջապես 2025-ի ԱԱ-ի համար ստացան ամառային մարզաձևերի համար նախատեսված հագուստ։ Եթե չեմ սխալվում, կառավարության որոշման մեջ գրված է «ՀՀ-ն պատշաճ ներկայացնելու համար»։ Եթե պատշաճ ներկայացնելը պետք է ամառային մարզահագուստով անել, բնականաբար սպորտը պետք է լինի սպորտի մասին... Ցավոք, 2026-ի խաղերին նախապատրաստվելու համար այդպես էլ ոչ մի ֆինանսավորում չտրվեց, արդյունքում չկարողացանք իրականացնել մեր ծրագիրն ու չհասանք մեր ակնկալած ուղեգրերի քանակին։ Միակ դրամական օգնությունը ստացել ենք ՀԱՕԿ-ից Միջազգային Օլիմպիական կոմիտեի համերաշխության ծրագրի շրջանակում։ Այն մեր ֆինանսավորման հետ շատ խնայողաբար ենք օգտագործել, որ ՕԽ - ում ներկայացուցիչներ ունենանք, այն փետրվարին կկայանա։

ՀՈՎՀԱՆՆԵՍ ՍԱՐԳՍՅԱՆ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝