ԱՄՆ-ը Հայաստանի և 74 այլ երկրի քաղաքացիներին այսուհետ ներգաղթային վիզա չի տրամադրի

ԱՄՆ-ի Պետդեպարտամենտը դադարեցնում է 75 երկրների համար ներգաղթային վիզաների տրամադրումը՝ սոցիալական նպաստներից կախված համարվող դիմորդների նկատմամբ վերահսկողության խստացման ջանքերի շրջանակներում: Fox News-ը հաղորդում է, որ ցուցակում են նաև Հայաստանը, Վրաստանը, Ադրբեջանը և Կենտրոնական Ասիայի երկրները։

Fox News Digital-ի կողմից առաջին անգամ հրապարակված Պետդեպարտամենտի հուշագրի համաձայն՝ հյուպատոսական աշխատակիցներին հանձնարարվել է մերժել վիզաների տրամադրումը՝ գործող օրենքի համաձայն, մինչ գերատեսչությունը վերանայում է իր ընտրության և ստուգման ընթացակարգերը։

Կասեցումը կսկսվի 2026 թվականի հունվարի 21-ից և կտևի մինչև վիզաների տրամադրման գործընթացի վերանայման ավարտը։

Պետդեպարտամենտը շեշտել է, որ սառեցման որոշումն ուժի մեջ կմնա այնքան ժամանակ, քանի դեռ Միացյալ Նահանգները չի համոզվել, որ նոր միգրանտները «չեն ապրի ամերիկյան ժողովրդի հաշվին»։

Հայաստանից բացի, սահմանափակումները կվերաբերեն Ռուսաստանին, Ադրբեջանին, Վրաստանին, Իրանին, Իրաքին, Բրազիլիային, Եգիպտոսին, Ղազախստանին, Թաիլանդին և այլ երկրների։

Ոչ ներգաղթային վիզաները նախատեսված են այլ երկիր ժամանակավորապես մեկնելու համար՝ որոշակի նպատակներով, ինչպիսիք են զբոսաշրջությունը (B2), բիզնեսը (B1), ուսումը (F1, M1), ժամանակավոր աշխատանքը (H, L) կամ փոխանակման ծրագրերին մասնակցելը (J1), ի տարբերություն ներգաղթային վիզաների, որոնք տալիս են մշտական ​​բնակության իրավունք։

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝