Թաթոյանը՝ պատերազմի սադրիչ

Ամերիկյան The Washington times պարբերականում հրապարակված իր հոդվածով է կիսվել «Միասնության թեւեր» կոչվող քաղաքական նախաձեռնության ղեկավար, Մարդու իրավունքների նախկին պաշտպան ԱՐՄԱՆ ԹԱԹՈՅԱՆԸ, որը տպավորություն է, թե ոչ այլ ինչ է, քան պատերազմի սադրանք:

«Խաղաղություն հաստատելը բացարձակ է, բայց Հայաստանի ինքնիշխան տարածքներն օկուպացիայից ազատելը չենք կարող թողնել հետագային եւ մոռացության մատնել: Չի կարելի ապրել մարող հույսերով, իսկ բանակցությունները չեն կարող ձեւացնել, թե բռնությամբ տարածքների զավթումը գոյություն չունի: Խաղաղություն հաստատելու հարցում ԱՄՆ-ի դերն իսկապես կարեւոր է: Պետք է հասնել նրան, որ ամերիկացի ու եվրոպացի միջնորդները հստակ հայտարարեն այն, ինչի մասին բոլորը գիտեն. ադրբեջանական զինված ուժերը շարունակում են օկուպացրած պահել Հայաստանի ինքնիշխան տարածքը, եւ դա անհամատեղելի է որեւէ արժանահավատ խաղաղ համաձայնագրի հետ»,- մասնավորապես նշել է նա:

Փաստորեն, ինչ է ստացվում՝ ճիշտ այն ժամանակ, երբ ԱՄՆ նախագահ Դոնալդ Թրամփը հայտարարում է միջազգային իրավունքի անպետքության մասին, իսկ Ադրբեջանի նախագահ Իլհամ Ալիեւը խոսում է, որ աշխարհում միջազգային իրավունք գոյություն չունի, բոլորը պետք է մոռանան դրա մասին, Թաթոյան Արմանը նստած սպասում է ամերիկացիների եւ եվրոպացիների միջնորդական հայտարարություններով ՀՀ ինքնիշխան տարածքների ազատագրմանը: Թաթոյանը կիլոմետրորով այնքան հեռու է քաղաքականությունից, որ փորձենք ավելի հանրամատչելի բացատրել. նոր դարաշրջան է սկսվել, որտեղ ում ուժը ում վրա պատի, կուտի: Իսկ արդեն գոյություն չունեցող միջազգային իրավունքը այլեւս հետաքրքիր չէ դրսից բերված միջնորդ տղաներին: Ավելին՝ չմոռանանք, որ հենց այդ նույն ամերիկացի եւ եվրոպացի միջազգային գործընկերները դավադիր լռությամբ հետեւում էին, թե ինչպես էր օկուպացվում Հայաստանի ինքնիշխան տարածքները: Այսքանից հետո՝ ի՞նչ է սպասում Թաթոյանը, որ հիմա պիտի ամերիկացիներն ու եվրոպացիները հուզված իր այս գաղափարներից ոչ միայն հոտընկայս ծափահարեն, այլեւ օկուպացված տարածքները վերադարձնե՞ն, Գանձակն ու Գետաշենն էլ վրադի՞ր:

Այն, որ Թաթոյանն ասում է, թե Հայաստանի ինքնիշխան տարածքներն օկուպացիայից ազատելը չենք կարող թողնել հետագային եւ մոռացության մատնել, մոտավորապես՝ նույնն է, ինչ ասում էր իշխանության եկած Նիկոլ Փաշինյանը ժամանակին. «Արցախը Հայաստան է եւ վերջ»: Ոգեւորիչ մի հայտարարություն, որը բերեց Արցախի ամբողջական հանձնման, հայաթափման ու կործանման: Հետեւապես, հարց է ծագում՝ ի՞նչ նպատակ է հետապնդում Արման Թաթոյանը հիմա, նա էլ է՞ փորձում նիկոլաբար պատերազմ հրահրել եւ Հայաստանի դեռ չօկուպացված տարածքները հանձնել Ադրբեջանի՞ն:

Ուշագրավ է այն, որ նույն Հայաստանի Հանրապետության ինքնիշխան տարածքում գտնվող ադրբեջանական ուժերը դուրս բերելու հարցում անգամ Նիկոլ Փաշինյանի իշխանության ասածն է ավելի տրամաբանության մեջ, քան Արման Թաթոյանինը:

ՀՀ պաշտպանության նախարար Սուրեն Պապիկյանը երեկ տված իր ասուլիսում ընդգծեց, որ ՀՀ ինքնիշխան տարածքում գտնվող ադրբեջանական ուժերը դուրս են բերվելու Հայաստանի եւ Ադրբեջանի սահմանազատման ու սահմանագծման հանձնաժողովների աշխատանքների արդյունքում:

«Սա կառավարության դիրքորոշումն է, եւ այն լուծումն է, որը կապահովի երկարաժամկետ խաղաղություն մեր տարածաշրջանում»,- ասել է Պապիկյանը:

Համաձայնեք, որ սա որքան էլ անիրական է, թե ադրբեջանական ուժերը կամովին կհամաձայնեն լքել օկուպացված տարածքները, բայց, համենայնդեպս, իրավիճակի սրման էլ չեն հանգեցնում: Մինչդեռ Արման Թաթոյանն առաջարկում է, այսպես ասած, տղա բերել Ադրբեջանի դեմ եւ արդեն իսկ տրամադրություններ է ստեղծում նոր էսկալացիայի համար:

ՀՐԱՆՏ ՍԱՐԱՖՅԱՆ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝