Աշխատանքից ազատել եմ ՊՆ բոլոր այն աշխատակիցներին, որոնց զավակներն այլ երկրի քաղաքացի են. Պապիկյան

Գաղտնիք չէ, որ մեր հասարակության մեջ կա արմատավորված մի վատ ավանդույթ,  յուրաքանչյուր «պատվախնդիր ծնող» «կաշվից դուրս է գալիս», ամեն ինչ պատրաստ է վաճառել, ամեն տեսակ խարդախության մեջ պատրաստ է մտնել, որպեսզի արու զավակին ազատի զինծառայությունից։ Այս մասին 2025 պաշտպանական տարին ամփոփելով՝ ասաց Պաշտպանության նախարար Սուրեն Պապիկյանը։ 
«Սա չգիտեմ ինչի բերումով, համարվել է սոցիալական որոշակի կարգավիճակի մասին հայտարարություն, որը համարում եմ ամենախայտառակ բանը, որ մեր հասարակության մեջ առկա է։ Ես վերջին մեկ տարվա ընթացքում աշխատանքից ազատել եմ բոլոր այն պաշտպանության նախարարության համակարգում գտնվող ծնողներին, ովքեր ունեն զավակներ՝ այլ երկրի քաղաքացի։ Իհարկե, անմեղության կանխավարկածը հաշվի առնելով, որոշակի վերապահումներ ունեմ նաև հիվանդություն ունեցողների նկատմամբ, բայց ամեն դեպքում կասկածի որդը շարունակում է ինձ ներսից կեղեքել, որպեսզի ես նրանց նկատմամբ նույնպես ուշադիր լինեմ։ Սա ի գիտություն մեր շատ սիրելի պաշտպանության նախարարության աշխատակիցների»,-ասաց Պապիկյանը։ 

Նա ընդգծեց, որ սա հանրային պրոբլեմ է։ «Սա միայն իմ պրոբլեմը չի, որը ազգային անվտանգության խնդիր է նաև։ Սա այն հիմնական սողանցքն է, շատ-շատ մարդկանց զավակներ կամ ուղղակի իրոք հիվանդ մարդիկ ազատվել են՝ այսպես կոչված գլխուղեղի կիստայով, սա այն հայտնի հիվանդությունն է, որը մարդկանց ուշադրության կենտրոնում է եղել, բայց սա ավելի զարգացել է տեխնոլոգիայի զարգացման բերումով; Մարդիկ գնացել և ամենափոքր խնդիրը ֆիքսել են, ընդ որում՝ մենք չենք փորձաքննվել, կարող է պարզվի, այդ թվում՝ նաև ձեր շրջանակներում գտնվող ծառայած մարդիկ՝ ձեր եղբայրները, ձեր ամուսինները, զավակները ծառայել են այդ խնդիրը ունենալով։ Մենք այս փոփոխության բերումով միայն հարյուրավոր առողջ երիտասարդների զորակոչել ենք բանակ։ Սա ունեցել է էական փոփոխություն մեր զորակոչի թվերի վրա։ Սա վերաբերում է բազմապիսի այլ հիվանդություններին,  ամեն տարի մենք 404 որոշման մեջ որոշակի փոփոխություններ ենք կատարում, մոնիտորինգի ենթարկելով նախորդ տարվա հիվանդությունների ավելացման տենդենցը։ Երբեմն լինում են դեպքեր, երբ կառավարության որոշման ցանկում հայտնվում է հիվանդություն, որը բանակ զորակոչելու ենթակա է, ու նախորդ տարվա հետ համեմատ՝ 80%-ով էդ հիվանդությունը հաջորդ տարի պակասում է, սա նրա մասին է, որ դա եղել է սողանցք, որը մենք փակել ենք մեր հետևողական աշխատանքի արդյունքում»,-ասաց Պապիկյանը։

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝