Ռոբոտը թենիս է խաղում առանց վրիպելու

Գիտնականները ստեղծել են մարդանման ռոբոտ, որը թենիսում հարվածների տպավորիչ ճշգրտություն է դրսևորում՝ ցույց տալով արհեստական բանականության և ռոբոտաշինության հնարավորությունները մարզական միջավայրում, հայտնում է Interesting Engineering-ը։

AI Sports Robotics Lab-ի հետազոտողների ստեղծած այս հումանոիդն ընդունակ է կատարել գնդակի կատարյալ ճշգրիտ մատուցումներ և հարվածներ՝ բարձր արագությամբ ու կայունությամբ արձագանքելով դրա դիրքին ու արագությանը, ինչը համեմատելի է պրոֆեսիոնալ թենիսիստների մակարդակի հետ:

Ռոբոտը հագեցած է համակարգչային տեսողության համակարգերով, բարդ սենսորներով և մեքենայական ուսուցման ալգորիթմներով, որոնք թույլ են տալիս իրական ժամանակում կանխատեսել գնդակի թռիչքի հետագիծը և հաշվարկել հարվածի համար օպտիմալ դիրքը:

Ցուցադրական փորձարկումների ժամանակ ռոբոտն արդյունավետորեն տեղաշարժվել է կորտում՝ սրընթաց հետևելով գնդակին, հարմարվելով դրա փոփոխություններին և ճշգրիտ հետ մղելով հարվածները թե՛ ուղիղ, թե՛ պտտվող հետագծերով։

Սենսորների և ծրագրային ապահովման համալիր ինտեգրման շնորհիվ ռոբոտը կարողացել է վայրկյանի մասնիկների ընթացքում ուղղել իր դիրքն ու ռակետի կարգավորումը՝ ապահովելով գրեթե կատարյալ հարված գնդակին։ Ըստ ստեղծողների, նման կարողությունները պահանջում են ոչ միայն մեխանիկական հաղորդակների բարձր ճշգրտություն, այլև տեսողական տեղեկատվությունն արագ մշակելու և ԱԲ ուսուցման հիման վրա որոշումներ կայացնելու ունակություն, ինչն այս մշակումը կարևոր քայլ է դարձնում մարզական ռոբոտաշինության ոլորտում:

Նախագծի հեղինակներն ընդգծում են, որ ներկայիս ձեռքբերումը ոչ միայն մեխանիկական հնարավորությունների ցուցադրություն է, այլև օրինակ, թե ինչպես կարող է ԱԲ-ն վերլուծել բարդ դինամիկ իրավիճակները, ինչպիսիք են մարզական մրցումները, և արձագանքել դրանց նույնքան արդյունավետ, որքան պրոֆեսիոնալ մարդը: Սա կարող է էական նշանակություն ունենալ ոչ միայն ռոբոտ-մարզիչների կամ խաղընկերների համար, այլև այնպիսի ինքնավար համակարգերի զարգացման գործում, որոնք ընդունակ են իրական ժամանակում սովորել և կատարելագործվել՝ հիմնվելով շրջակա միջավայրի հետ հետադարձ կապի վրա:

Չնայած տպավորիչ արդյունքներին, մշակողները նշում են, որ նման ռոբոտներին իրական մրցումներում կիրառելուց առաջ դեռևս անհրաժեշտ է լուծել մի շարք խնդիրներ, այդ թվում՝ խաղային իրավիճակի անսպասելի փոփոխություններին հարմարվելու ունակության բարելավումը, էներգասպառումը և մարդկանց հետ փոխազդեցության անվտանգությունը:

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝