2026 թ-ից քաղաքացին կարող է անվճար շտապօգնություն կանչել տարեկան ոչ ավելի, քան 8 անգամ

Առողջապահության համընդհանուր ապահովագրության փաթեթով քաղաքացին կարող է տարեկան ոչ ավելի, քան 8 անգամ շտապօգնության կանչ գրանցել և ստանալ անվճար բուժօգնություն։ Sputnik Արմենիայի հետ զրույցում այս մասին ասաց Հանրապետական շտապօգնության ծառայության տնօրեն Սահակ Հակոբյանը։

Ինչպես հայտնի է, 2026 թ. հունվարի 1-ից ՀՀ քաղաքացիները կներառվեն առողջության համընդհանուր պարտադիր ապահովագրական համակարգում։

Հակոբյանի խոսքով` գոյություն ունեն բազմաթիվ բացառություններ, որոնք շտապօգնության տրամաբանության մեջ են։

«Ես ձեզ վստահեցնում եմ, որ ոչ մի կանչ անպատասխան չի մնա, և եթե շտապօգնության կանչը տրամաբանության մեջ է, ապա այն անպայման կսպասարկվի աշխատախմբի կողմից։ Իսկ եթե կանչը շտապօգնության տրամաբանությունից դուրս է, ապա այն կուղղորդվի համապատասխան առողջապահական օղակներ»,–ասաց Հակոբյանը։

Նա մանրամասնեց, որ 8 զանգից ավելիի դեպքում շտապօգնության կանչի գումարը տարբեր համայնքներում տարբեր է` 10.000– 15000 դրամի շրջանակում։

Հակոբյանը շեշտեց, որ շատ քաղաքացիներից ստանում են նաև շտապօգնության անտեղի կանչեր։ 2026 թվականից իրենք նման կանչերը կփորձեն մերժել կամ որոշ դեպքերում կսահմանափակվեն խորհրդատվությամբ։

«Կանչեր ենք ունենում, որոնք բացարձակ շտապօգնության հետ որևէ աղերս չունեն։ Այսուհետ այդ զանգերի սպասարկումը կփորձենք մերժել։ Մենք ունենք «թոփ հաճախորդներ», որոնք որ տարեկան միջինում 500– 600 կանչ են գրանցում։ Մենք ունենք մի հաճախորդ, որը 1200– ից ավել կանչ է արել»,–ասաց նա։

ՀՀ–ում արտակարգ իրավիճակների դեպքում այսուհետ կգործի 11–2–ը հեռախոսահամարը

Անդրադառնալով 2026 թվականից սպասվող գլոբալ փոփոխություններին` Հակոբյանը նշեց, որ դրանցից ամենակարևորն այն է, որ Երևանում ստեղծվելու է մեկ միասնական զանգերի կենտրոն, որը 1.03 հեռախոսահամարով սպասարկելու է ողջ հանրապետությունից եկող զանգերը (այդ թվում` Երևանից) և ուղղորդելու է համապատասխան մոտակա աշխատախմբին։

https://arm.sputniknews.ru/20260101/2026-tic-qaghaqacin-karvogh-e-anvtshar-shtapognutjun-kanchel-tarekan-voch-aveli-qan-8-angam-97185706.html

Մանրամասն՝ սկզբնաղբյուր կայքում։

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝