«ՀԵՐՈՍԱԲԱՐ ԶՈՀՎԵԼ Է ՄԱՐՏԱԿԱՆ ԱՌԱՋԱԴՐԱՆՔ ԿԱՏԱՐԵԼԻՍ». ԱՆՄԱՀ ՀԵՐՈՍ ԳՈՌ ԳՐԻԳՈՐՅԱՆ

Դեկտեմբերի 26-ը, անմահ հերոս ԳՈՌ ԲԱԲԿԵՆԻ ԳՐԻԳՈՐՅԱՆԻ ծննդյան օրն էր, կդառնար 35 տարեկան։ Նրա հուշարձանին են այցելել հարազատներ, ընկերներ, ծաղիկներ խոնարհել ու խնկարկել։

Անմահ հերոսի հայրը ԲԱԲԿԵՆ ԳՐԻԳՈՐՅԱՆԸ, խորը ցավը սրտում, Iravunk. com -ի հետ զրույցում նշեց.

«Գոռս ծնվել է 1990 թվականի դեկտեմբերի 26-ին, Արմավիրի մարզի Ջանֆիդա գյուղում։ Նա շատ սիրում էր հայրենիքն ու մեծ հպարտությամբ խոսում իր զինվորների մասին, լեյտենանտ էր։ Հազվագյուտ տղա էր, ես անկեղծ ասած այդպիսի զավակ չեմ եղել իմ ծնողների համար։ Իմ տղան իսկական որդի էր, իմ եղբայրն էր, իմ հպարտությունը։ Գոռս, սիրելով ընտանիքը, սիրում էր նաև հայրենիքն ու շատ մեծ հպարտությամբ պատմում իր զինվորների մասին։ Հարգում ու սիրում էր զինվորական համազգեստը, իսկական հայ սպա էր։ Հորեղբոր որդու հետ ավարտական դասարանում պատրաստվում էին դիմել Ագրարային համալսարան, սակայն, մի քանի օրից եկան ասացին, որ դիմում են գրել Վազգեն Սարգսյանի անվան ռազմական ինստիտուտ ընդունվելու համար։ Բնավորությամբ, կարգապահությամբ իսկական սպա էր, նա իր տեղը գտել էր բանակում։ Հետագայում, ես զգացի, որ տղաս ճիշտ ընտրություն է կատարել։

Այսօր էլ սպասում ենք, որ մի օր Գոռս բացելու է տան դուռը ու ներս գա։ Մեր ցավը շատ խորն է։ Մենք այսօր ապրում ենք հանուն Գոռի պայծառ հիշատակի ։Փառք ու պատիվ բոլոր զինվորներին ու պատիվ բոլոր այն տղաներին, ովքեր գնացին դեպի հավերժության գիրկը»։

Գոռ Գրիգորյանը ինստիտուտն ավարտելուց հետո, 2012֊ի հուլիսի 28-ին ծառայության է անցել ՊԲ N զորամասում։ Հերոսաբար զոհվել է 2014 թվականի օգոստոսի 1֊ին մարտական առաջադրանք կատարելիս։ Հետմահու պարգևատրվել է «Մարտական ծառայության» մեդալով։

ՇՆՈՐՀԱՎՈՐ ԵՐԿՆԱՅԻՆ ԾՆՈՒՆԴԴ, ԱՆՄԱՀ ՀԵՐՈՍ։ ՔՈ ՍԽՐԱՆՔՆ ԱՆՄԱՀ Է, ՔՈ ԱՆՈՒՆԸ ՄԵՐ ՍՐՏԵՐՈՒՄ։ ՀԱՎԵՐԺ ՓԱՌՔ ՄԵՐ ԲՈԼՈՐ ՀԵՐՈՍՆԵՐԻՆ...

Պատրաստեց ՀՈՎՀԱՆՆԵՍ ՍԱՐԳՍՅԱՆԸ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝