Ինչ ծառայություններ են հասանելի լինելու ապահովագրական փաթեթով․ Մանրամասներ

Ազգային ժողովն առաջին ընթերցմամբ ընդունել է «Առողջության համապարփակ ապահովագրության մասին» օրենքի նախագիծը, որն ուժի մեջ է մտնելու 2026թ․ հունվարի 1-ից, բայց ենթադրում է փուլային ներդրում։ Սա նշանակում է, որ բոլորը չէ, որ միանգամից ընդգրկվելու են համակարգում։

Առողջապահության նախարարությունից հետաքրքրվել ենք, թե ում համար և ինչ պայմաններով է սկսելու գործել ապահովագրությունը 2026 թվականի հունվարի 1-ից․

Ովքե՞ր են շահառուները 2026 թվականից

2026-ի հունվարի 1-ից համակարգը կգործի բնակչության երկու հիմնական հատվածի համար՝ պետության կողմից ապահովագրվող խոցելի խմբերի և բարձր եկամուտ ունեցող աշխատողների։

Ա. Պետության կողմից անվճար ապահովագրվողներ (Խոցելի խմբեր)

Հետևյալ քաղաքացիների համար ապահովագրավճարը կատարելու է պետությունը.

• Մինչև 18 տարեկան երեխաներ,
• 65 տարեկան և բարձր տարիքի անձինք,
• Հաշմանդամություն ունեցող անձինք,
• Սոցիալապես անապահով (Փարոս համակարգում ընդգրկված) ընտանիքների անդամներ,
• Չեռնոբիլի ատոմակայանի վթարի վերացման մասնակիցներ,
• Երկրորդ համաշխարհային պատերազմի մասնակիցներ և բռնադատվածներ,
• Հաշմանդամություն ունեցող անձի խնամող հանդիսացող ծնողներից մեկը։

Բ. Վճարովի հիմունքներով միացողներ (Բարձր եկամուտ ունեցողներ)

Աշխատող քաղաքացիներից 2026-ից համակարգին պարտադիր միանալու են միայն նրանք, ովքեր ունեն որոշակի շեմից բարձր եկամուտ.

• Վարձու աշխատողներ, որոնց աշխատավարձի հաշվարկման բազան ամսական 200,001 դրամ և ավելի է։
• Անհատ ձեռնարկատերեր, նոտարներ և քաղաքացիաիրավական պայմանագրով աշխատողներ, որոնց տարեկան եկամուտը (հաշվարկման բազան) գերազանցում է 2,400,001 դրամը։

200,000 դրամից ցածր աշխատավարձ ստացողները կմիանան համակարգին մեկ տարի ուշ՝ 2027-ից:

Որքա՞ն է կազմելու վճարը

• Խոցելի խմբերի համար (երեխաներ, թոշակառուներ և այլն)՝ 0 դրամ (վճարում է պետությունը)։
• Աշխատող քաղաքացիների համար՝ Նախագծով նախատեսվում է տարեկան 120,000-ից 164,400 դրամ։
  • Սա կազմում է ամսական մոտ 10,000 — 13,700 դրամ։
  • Գումարը պահվելու է աշխատավարձից (ինչպես եկամտային հարկը) կամ վճարվելու է ինքնուրույն՝ կախված աշխատանքի տեսակից։

Պարտադիր պայման՝ կանխարգելիչ բուժզննում

Անկախ նրանից՝ պետությունն է վճարում ձեր փոխարեն, թե դուք ինքներդ, ապահովագրական փաթեթից օգտվելու համար պարտադիր է տարին մեկ անգամ անցնել կանխարգելիչ բուժզննում (check-up)։

• Սա անվճար է և ներառված է փաթեթում։
• Եթե չեք անցել ստուգումը, բուժօգնությունը չի հատուցվի (բացառությամբ շտապ դեպքերի)։

Ի՞նչ ծառայություններ են հասանելի լինելու

Ապահովագրական փաթեթը ներառում է.

• Անվճար հետազոտություններ (արյան անալիզ, ռենտգեն, սոնոգրաֆիա և այլն),
• Հիվանդանոցային բուժում (թերապևտիկ և վիրաբուժական),
• Սրտի վիրահատություններ (ստենտավորում, շունտավորում),
• Քաղցկեղի բուժում (վիրահատություն, քիմիաթերապիա),
• Դեղորայք (քրոնիկ հիվանդությունների դեպքում),
• Շտապօգնություն։

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝