Մի՞թե թատրոնում ամենաանպետքական հաստիքը ռեժիսորինն էր. ԶԱՐՄԱՆՔ

Պարզվում է, որպեսզի Նիկոլ Փաշինյանի համար «Բենթլի Կճոյանը» կրկին դառնար Գերաշնորհ սրբազան հայր՝ ընդամենը պետք էր, որպեսզի հպատակվեր իրեն եւ միանար հակաեկեղեցական արշավին: Հակակոռուպցիոն դատարանը մերժել է Արարատյան հայրապետական թեմի փոխանորդ Տ. ՆԱՎԱՍԱՐԴ արքեպիսկոպոս ԿՃՈՅԱՆԻ դեմ առերեւույթ ապօրինի ծագման գույքի բռնագանձման հայցը: Այս մասին հայտնում են ՀՀ Գլխավոր դատախազությունից: Ի՞նչ է ստացվում, 2023 թվականին դատախազությունը սկսում է ուսումնասիրել Նավասարդ սրբազանի գույքը։ 2024-ի սեպտեմբերին դատարանը մերժում է դատախազության հայցն ընդդեմ Կճոյանի։ 2025-ի սեպտեմբերին դատախազությունը նորից Կճոյանի դեմ հայց է ներկայացնում եւ նորից մերժում, ինչը լրիվ «պատահականորեն» համընկնում է Կճոյանի եւ Փաշինյանի համատեղ ողջագուրանքների հետ՝ պատարագների ժամանակ: Էլ շանտաժն ինչպե՞ս է լինում, հո պոզ ու պոչ չէ՞ր ունենալու: Ահա, թե ինչ գին արժեր Նավասարդ արքեպիսկոպոսի առերեւույթ ուրացումը:

Իսկ Նավասարդ արքեպիսկոպոս Կճոյանի օրհնությամբ՝ Երեւանի քաղաքապետ դարձած ՏԻԳՐԱՆ ԱՎԻՆՅԱՆԸ լուծարել է Պատանի հանդիսատեսի թատրոնի ռեժիսորի հաստիքը։ Երեւանի քաղաքապետարանից տեղեկացրել են, որ գործող թատրոնում ռեժիսորի հաստիքը կրճատելով՝ հնարավորություն է ընձեռվելու բեմադրությունների իրականացման համար հրավիրել այլ ռեժիսորների, տարբեր ձեռագրեր ունեցող բեմադրիչների։ Ախր, ինչպես ասես, որ հանրամատչելի լինի նաեւ քաղաքապետարանի պաշտոնյաների համար: Ինչպես կասեր, այս իշխանության սիրելի երգիչ Թաթա Սիմոնյանը, սա նույն է, որ Նոր տարին գա՝ առանց Ձմեռ պապ, ասես հարսանիք՝ առանց փեսա, առանց հարս, առանց պար: Լավ, մի՞թե թատրոնում ամենաանպետքական հաստիքը ռեժիսորինն էր: Թե՞ կոնկրետ անձից ազատվելու համար է քաղաքապետարանը հաստիքներ կրճատում:

Ի դեպ, Հայ Առաքելական Սուրբ եկեղեցու եւ հոգեւորականների դեմ իրականացվող իշխանական «դիվերսիան» ամբողջական չէր լինի, եթե դրան ակտիվ մասնակցություն չունենար Նիկոլ Փաշինյանի զուգընկեր Աննա Հակոբյանի «Կրթվելը նորաձեւ է» արշավի «դասախոս», Տիկնիկային թատրոնի գեղարվեստական ղեկավար ՌՈՒԲԵՆ ԲԱԲԱՅԱՆԸ՝ իր մտքի «գոհարներով»: «Ովքեր ուզում են քաղաքականությամբ զբաղվել, պետք է եկեղեցուց դուրս գան», - լրատվամիջոցներից մեկի հետ զրույցում ասել է Բաբայանը: Իսկ թե ինչու նա ամբողջ կյանքում զբաղվեց քաղաքականությամբ, սորոսական հիմնադրամներում հոգաբարձու, բայց այդպես էլ Տիկնիկային թատրոնից դուրս չեկավ, սա թերեւս բրիտանացի գիտնականները միայն կարող են պատասխանել: «Սկսած ՔՊ-ական պաշտոնյաներից, վերջացրած այսպիսի խուրդա քարոզիչներով ու ֆեյքերով համառորեն՝ ամենօրյա ռեժիմով այն թեզն են առաջ տանում, թե «հոգեւորականները չպիտի զբաղվեն քաղաքականությամբ»։ Եթե չոր իրավական տեսանկյունից նայենք, ապա դա հակասահմանադրական պնդում է։ Սահմանադրությունում չկա որեւէ արգելք հոգեւորականների՝ քաղաքականությամբ զբաղվելու մասով։ Միջազգային իրավունքի տեսակետից էլ է այդ պնդումը քաղաքական եւ քաղաքացիական իրավունքների ոտնահարում։ Այդ իրավունքները ամրագրված են մի շարք միջազգային փաստաթղթերում, որի տակ ստորագրել է Հայաստանը», - ընդգծում է ռազմական փորձագետ Կարեն Վրթանեսյանը՝ ի գիտություն Բաբայանի եւ բաբայանանմանների։

ԶԱՐՄԱՑԱԾ Է «ԻՐԱՎՈՒՆՔ»-Ը 

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝