Չկա ազատազրկված անձ, ով ունի առողջական խնդիր եւ մեր տեսադաշտից դուրս է.Դատապարտյալի ահազանգի հետքերով

 «Իրավունքը» շարունակում ուշադրության կենտրոնում պահել անազատության մեջ գտնվող անձանց պահման պայմանները, տարեց-տարի իականացվող բարեփոխումների շղթան եւ, որ ամենակարեւորն է, կալանավորված անձանց և դատապարտյալների առողջությունը, պատշաճ բժշկական օգնություն և սպասարկման ծառայություններ մատուցելու ընթացակարգերը։ Եվ ահա, նախօրերին խմբագրություն էր դիմել «Արթիկ» ՔԿՀ-ի 41-ամյա դատապարտյալ Արկադի Մարտիրոսյանը, ով փորձում էր լրատվամիջոցի միջոցով իր դժգոհությունը հայտնել  «Քրեակատարողական բժշկության կենտրոն» ՊՈԱԿ-ի գործունեությունից․  «Մի քանի ծանր վիրահատություններ եմ տարել, ունեմ առողջական լուրջ խնդիրներ, բայց ՊՈԱԿ-ի կողմից այդ խնդիրները անտեսվում են: Դիմումներ եմ գրել, որ ինձ անհրաժեշտ է լուրջ հետազոտություն, այդ հետազատությունները ՔԿՀ-ից դուրս են իրականացվում, ասում են՝ հա խնդիր չկա, կանենք, բայց ոչ մի արդյունք։ Դեղեր չեն տրամադրում, բուժմանս համար անհրաժեշտ դեղորայքը թոշակառու մայրս է գնում բերում։ Ես կորցրել եմ ամեն ինչ, հիմա էլ չեմ ուզում առողջությունս իսպառ կորցնեմ, օգնեք, որ օգնեն ինձ ստանալ անհրաժեշտ բուժօգնություն, որ 2030 թվականին ազատվել ու նոր կյանք սկսեմ։ Ինձ տանը սպասող կա՝  թոշակառու մայրս»,-այսպես իր դժգոհությունը ձեւակերպեց կալանավայրի ճանապարհը մի քանի անգամ բռնած դատապարտյալ Մարտիրոսյանը։

Որքանո՞վ է դատապարտյալի հնչեցրած դժգոհությունը համապատասխանում իրականությանը, ինչո՞ւ է, ըստ էության անտեսվում անազատության մեջ գտնվող անձի առողջության հետ կապված խնդիրը, հարցի պատասխանը փորձել ենք ստանալ ՀՀ առողջապահության նախարարության «Քրեակատարողական բժշկության կենտրոն» ՊՈԱԿ-ի Բժշկական օգնության կազմակերպման բաժնի պետ Նաիրա Բաբայանից, ով զերծ մնալով տվյալ անձի առողջության հետ կապված անձնական տվյալների հրապարակումից փաստեց միայն, որ տվյալ դատապարտյալի առողջության հետ կապված ցանկացած խնդիր լուծում է գտնում օրենքով սահմանված կարգով՝ հնարավորինս կարճ ժամանակահատվածում․

-Առհասարակ, թե՛ տվյալ դատապարտյալը, թե՛ այլ ազատազրկված անձ, ով ունի առողջական վիճակով պայմանավորված որեւէ բժշկական միջամտության ցուցում՝ գտնվում է մեր ամենօրյա ուշադրության կենտրոնում։ Բժշկական ցուցմանը համաձայն (շտապ կամ պլանային) տրամադրվում է անհրաժեշտ բժշկական օգնություն եւ սպասարկում։ Չկա ազատազրկված անձ, ով ունի առողջական խնդիր եւ մեր տեսադաշտից դուրս է , դա վստահաբար։

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝