«ԵԶՐԱՓԱԿՉՈՒՄ ՄՐՑԱՎԱՐՆԵՐԸ ԱՆԱՐԴԱՐ ՎԱՐՎԵՑԻՆ». ԲՌՆՑՔԱՄԱՐՏԻ Մ23 ՏԱՐԵԿԱՆՆԵՐԻ ԵՎՐՈՊԱՅԻ ՓՈԽՉԵՄՊԻՈՆ ՄԱՐԱՏ ՄԻՔԱՅԵԼՅԱՆ

Օրերս Երևանում կայացավ Բռնցքամարտի Մ23 տարեկանների և երիտասարդների առաջնությունները, որի ժամանակ փառահեղ հանդես եկան ու լավ արդյունք գրանցեցին մեր երկրի կաշվե ձեռնոցի մարտիկները։

Երիտասարդ բռնցքամարտիկներին հաջողվեց նվաճել 4 ոսկե, 5 արծաթե և 4 բրոնզե մեդալ։ Իսկ Մ23 տարեկանների խմբում նվաճեցին 2 ոսկե, 6 արծաթե և 5 բրոնզե մեդալ։ Աղջիկների հավաքականը նվաճեց 1 ոսկե /Էլիդա Քոչարյան /, 3 արծաթե և 3 բրոնզե։ Թիմային հաշվարկում մեր երկրի երիտասարդների և Մ23 տարեկանների հավաքականները գրավեցին 2-րդ հորիզոնականը 25 պետության մեջ զիջելով միայն Ռուսաստանի Դաշնությանը։

Iravunk. com -ի մարզական լրագրողը կապ է հաստատել ու զրուցել Մ23 տարեկանների Եվրոպայի փոխչեմպիոնի տիտղոսը նվաճած, Էջմիածնի «Համլետ Պատուրյանի» անվան մարզադպրոցի սան ՄԱՐԱՏ ՄԻՔԱՅԵԼՅԱՆԻ հետ։ Նա այսպես մեկնաբանեց իր նվաճումը.

- 75 կգ քաշային կարգում եմ հանդես եկել ։Մեկնարկային մենամարտի ժամանակ 5։0 հաշվով հաղթեցի Սերբիայի ներկայացուցչին, ապա կրկին 5։0 հաշվով պարտության մատնեցի մոլդովացի մարտիկին։ Եզրափակչում մրցակիցս ռուս մարզիկն էր, նա Աշխարհի փոխչեմպիոն էր, և մրցավարները, ցավոք, անարդար վարվեցին, թեև ես էլ սխալ ունեի։ Ու այդպես 3։2 հաշիվ գրանցեցին հաղթանակը շնորհելով ռուս մրցակցիս։

Իսկ ահա Մարատի անձնական մարզիչը ԽԱՉԻԿ ԽԱՉԱՏՐՅԱՆԸ նշեց.

- Միանշանակ շատ գոհ եմ մարզիկներից, նրանք ուղղակի փայլուն հանդես եկան։ Մարատ Միքայելյանն իսկապես կարող էր ու արժանի էր ոսկե մեդալ նվաճելու, բայց ցավոք մրցավարները անարդար վարվեցին ու հաղթանակը շնորհեցին ռուս մարզիկին։ Նշեմ, որ մեր սաներից բրոնզե մեդալի արժանացավ աղջիկներից Վարդուհի Ասլանյանը։ Մեր մարզադպրոցից ևս 2 Եվրոպայի երիտասարդների չեմպիոններ ունեցանք ՎԱՂԱՐՇԱԿ ՔԵՅԱՆԸ և ԱՐԳԻՇՏԻ ՀԱԿՈԲՅԱՆԸ։

Մինչև 23 տարեկաններում ոսկե մեդալ նվաճեցին ՄԱՆՎԵԼ ՊԵՏՐՈՍՅԱՆԸ 63 կգ, ՀԱՐՈՒԹՅՈՒՆ ՀԱԿՈԲԿՈԽՅԱՆԸ 71 կգ։

Ընդհանրապես, ուրախալի փաստ պիտի արձանագրեմ, որ մեր երկրի հավաքականները, թե երիտասարդների, թե Մ23 տարեկանների, իսկապես փայլուն հանդես եկան, ու պատմական արդյունք գրանցեցին հայկական բռնցքամարտի տարեգրության մեջ։ Մեր երկիրը 25 պետությունների մեջ զիջեց միայն ամենաուժեղ Ռուսաստանի հավաքականին։

Պատրաստեց ՀՈՎՀԱՆՆԵՍ ՍԱՐԳՍՅԱՆԸ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝