Տարբեր քաղաքներում փաթեթներ սփռողն ամենեւին էլ Սանտան չէր

Անօրինական թմրաշրջանառության վերաբերյալ ստացած տեղեկությունն իրացնելիս Համայնքային ոստիկանության Արմավիրի բաժնի ծառայողները Արմավիր քաղաքի Ջիվանու փողոցում ձերբակալել են Երեւանի Գայի փողոցի բնակիչ 22-ամյա երիտասարդի եւ իր վարած մեքենայով հանդերձ տեղափոխել են բաժին:

Նրա խուզարկությամբ հայտնաբերվել է կպչուն ժապավենով մեկ փաթեթ` լցված մարիխուանայի նմանվող զանգվածով: Երիտասարդը հայտնել է, որ «Տելեգրամ» հավելվածի միջոցով ձեռք է բերել նման 20 փաթեթ` դրանք տեղադրելու նպատակով:

Դրանցից երկուսն արդեն տեղադրել է Երեւանում, 14-ը` Վաղարշապատում, երեքն էլ` Արմավիր քաղաքում: Արմավիրի մարզային քննչական վարչությունում նախաձեռնվել է քրեական վարույթ, որի շրջանակում նույն օրը կատարված զննությամբ երիտասարդի տեղադրած փաթեթները հայտնաբերվել են:

Դատարանի որոշմամբ՝ խուզարկվել է նաեւ երիտասարդի ավտոմեքենան. Հայտնաբերվել է դեղնականաչավուն զանգվածով լցված եւս 9 փաթեթ: Հանգամանքները պարզվում են:

ԶԵՆՔ-ԶԻՆԱՄԹԵՐՔԸ ՀԱՅՏՆԱԲԵՐՎԱԾ Է, 32-ԱՄՅԱ ՏՂԱՄԱՐԴԸ՝ ՁԵՐԲԱԿԱԼՎԱԾ

Համայնքային ոստիկանության Արմավիրի բաժնում ստացվել էր օպերատիվ տեղեկություն, որ Ակնալիճ գյուղի բնակիչ 32-ամյա տղամարդը տանն ապօրինի պահում է զենք-զինամթերք։

Տեղեկությունը ստուգելու նպատակով նոյեմբերի 18-ին ոստիկաններն այցելել են տղամարդուն: Բացատրական աշխատանքի արդյունքում տանտերը ներկայացրել է մեկ ատրճանակ եւ ողորկափող որսորդական մեկ հրացան` ութ փամփուշտով։

Տղամարդը ձերբակալվել եւ տեղափոխվել է բաժին, իսկ կազմված փաստաթղթերը ներկայացվել են Արմավիրի մարզային քննչական վարչություն։ Հանգամանքները պարզվում են:

ՀԵՏԱԽՈՒԶՄԱՆ ՄԵՋ ԳՏՆՈՂ ԵՐԻՏԱՍԱՐԴԸ ՁԵՐԲԱԼԱՎԵՑ ԹՄՐԱՆՅՈՒԹ ՕԳՏԱԳՈՐԾԵԼՈՒ ԿԱՍԿԱԾԱՆՔՈՎ

Երեւանի գնդի 1-ին գումարտակի պարեկները թմրամիջոց օգտագործելու եւ պահելու կասկածանքով նոյեմբերի 16-ին Քրիստափորի փողոցում ձերբակալել եւ Համայնքային ոստիկանության Էրեբունու բաժին են ներկայացրել 24-ամյա մի երեւանցու։

Պարզվել է, որ 2024 թվականից նա հետախուզվում էր ավազակության եւ վարելու իրավունքից զրկված անձի կողմից տրանսպորտային միջոց վարելու մեղադրանքներով, խափանման միջոցը՝ կալանք։

Երիտասարդի անձնական խուզարկությամբ հայտնաբերվել է նաեւ դեղնականաչավուն զանգված։

ՏՂԱՄԱՐԴՈՒ ՄՈՏ ՀԱՅՏՆԱԲԵՐԵԼ ԵՆ ՄԱՐԻԽՈՒԱՆԱ, ՏԱՆ ԶՆՆՈՒԹՅԱՄԲ՝ ԿԱՆԵՓ

Համայնքային ոստիկանության Արարատի բաժնի ծառայողները ստացել էին օպերատիվ տեղեկություն, որ Արարատ գյուղի մի բնակիչ աճեցնում է կանեփ եւ օգտագործում թմրամիջոցներ:

Նոյեմբերի 14-ին ոստիկանները ստուգել էին տեղեկությունը, եւ Արարատ գյուղի բնակիչ 30-ամյա տղամարդը հաստատել էր, որ ճիշտ է: Նա ձերբակալվել ու տեղափոխվել է բաժին, որտեղ նրա խուզարկությամբ հայտնաբերվել է դեղնականաչավուն զանգված:

Վեդիի քննչական բաժնում հարուցված քրեական վարույթի շրջանակում կատարված զննությամբ 30-ամյա տղամարդու տանը հայտնաբերվել է տարայի մեջ աճեցված կանեփի 14 բույս։ Ըստ տանտիրոջ` բույսերն ինքն էր մշակել անձնական օգտագործման համար։ Հանգամանքները պարզվում են:

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝