ԵՄ անդամ լինել ու ԵԱՏՄ-ի հետ առեւտուր անել ոչ ոք Հայաստանին թույլ չի. Բալասանյան

ԵՊՀ Միջազգային հարաբերությունների եւ դիվանագիտության ամբիոնի դոցենտ, միջազգայնագետ ԳՐԻԳՈՐ ԲԱԼԱՍԱՆՅԱՆԻ կարծիքով՝ Եվրոպական ապագա Հայաստանը չունի: Եվրասիական վեկտորը՝ մասնակցությունը ԵԱՏՄ-ին եւ ՀԱՊԿ-ին, երկրի կայունությունն ու պաշտպանությունն ապահովող միակ ուղղությունն է: Այս մասին նա ընդգծեց Երեւանում կայացած «Եվրասիական ինտեգրացիան եւ Հայաստանի Հանրապետության տնտեսական զարգացման հեռանկարները» խորագրով միջազգային կլոր սեղանի ժամանակ: Ըստ նրա` Եվրամիությանը Հայաստանի անդամակցության համար իրական պայմաններ այսօր չկան:

— Անդամակցության ընթացակարգը ենթադրում է, առաջին հերթին, պաշտոնական հրավերի առկայություն, իսկ Հայաստանը հրավեր չի ստացել: Բացի այդ, առկա է ԵՄ եւ ԵԱՏՄ իրավական սկզբունքների հիմնարար անհամատեղելիություն: Եվրոպական դաշինքին անդամակցելը կպահանջի դուրս գալ Եվրասիական տնտեսական միությունից, իսկ դա լուրջ տնտեսական ռիսկերի հետ կապված քայլ է: Հայաստանի արտահանման ներուժն առաջին հերթին ուղղված է ԵԱՏՄ շուկային, մինչդեռ ԵՄ մատակարարումները նվազագույն մակարդակի են: Հայաստանը, ինչպես ցանկացած այլ երկիր, չի կարող միանգամից երկու աթոռի վրա նստել: ԵՄ անդամ լինելն ու ԵԱՏՄ-ի հետ առեւտուր անելն անթույլատրելի է, եւ ոչ ոք Հայաստանին թույլ չի տա դա անել: Բացի այդ, Հայաստանը ՇՀԿ-ին անդամակցելու հայտ է ներկայացրել:

Ինչ վերաբերում է Եվրամիության ընդլայնման հեռանկարներին, ԵՄ պաշտոնական փաստաթղթերում հստակ նշված է՝ միակ երկիրը, որն իրապես հավակնում է մոտակա ժամանակներում անդամակցության, Մոնտենեգրոն է: Այս պայմաններում Հայաստանի եվրոպական հեռանկարի քննարկումը զուրկ է գործնական իմաստից: Չմոռանանք նաեւ Ուկրաինայի դառը փորձը. այդ երկիրը դարձել է զինափորձարան, որտեղ բախվում են տարբեր կենտրոնների եւ ուժերի աշխարհաքաղաքական շահերը: Հայաստանում նման բան թույլ տալ չի կարելի:

ՀՐԱՆՏ ՍԱՐԱՖՅԱՆ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝