Վեհափառի եղբորն ու եղբորորդուն տեղափոխեցին ՁՊՎ

«Իրավունք»-ի տեղեկություններով՝ Ամենայն Հայոց կաթողիկոսի եղբորը՝ Գեւորգ Ներսիսյանին եւ եղբորորդուն՝ Համբարձում Ներսիսյանին, Քննչական կոմիտեից տեղափոխել են Ձերբակալվածների պահման վայր:

Վեհափառ Հայրապետի գահակալության տարեդարձի օրով եղբորն ու եղբորորդուն շինծու գործով ձերբակալելը, անխոս, նման է քաղաքական փնթի պատվերի: Ընդ որում՝ այն աստիճան, որ իրավապահներն առ այս պահը դատական նիստ չեն նշանակել:

Հիշեցնենք, որ Վաղարշապատ խոշորացված համայնքում «Հանրապետություն» կուսակցության թեկնածու Հարություն Մկրտչյանը «Ֆեյսբուք»-ի իր էջում գրառում է կատարել, որով հայտնել է, թե իբր նոյեմբերի 1-ին ժամը 16:10-ի սահմաններում, Կաթողիկոսի եղբայրը՝ Գեւորգ Ներսիսյանը իր որդիների հետ խոչընդոտել է նախընտրական քարոզչությանը: Այսօր քննչական մարմինը 68 ամյա Գեւորգ Ներսիսյանինին եւ որդուն՝ Համբարձում Ներոիսյանին կալանավորման նպատակով դատարան տանելու համար ձերբակալելու որոշում է կայացրել: Ներսիսյաններին մեղադրում են խուլիգանության եւ քարոզչությանը խոչընդոտելու արարքներ կատարելու մեջ: Ըստ փաստաբան Արա Զոհրաբյանի, իրականում չկա նույնիսկ հանցագործությանը նմանվող դեպք:

«Դեպքը տեղի է ունեցել այսպես. Համբարձումը նոյեմբերի 1-ին ժամը 14:40-ի սահմաններում, իր տան դարպասի դիմաց կանգնած է եղել, իրեն է մոտեցել մի մարդ և առաջարկել է մասնակցել Հանրապետություն կուսակցության ժամը 16:00-ի հանդիպմանը: Համբարձումը հրաժարվել է, նշված մարդը փորձել է համոզել, խոսել են, այնուհետև մոտեցել է Համբարձումի հայրը՝ Գևորգ Ներսիսյանը, երեքով խոսել են և խաղաղ բաժանվել: Այս բոլորը տեսագրված է: Դուք կարող եք ինքներդ տեսնել, որ տեսանյութում որևէ կոնֆլիկտ չկա: Այս հանդիպումը եղել է Ներսիսյանների տան դիմաց, ավելի վաղ, քան Հանրապետություն կուսակցության նախընտրական հանդիպումը: Հարգելի քննիչներ եղբայրաբար հորդորում եմ մի թույլ տվեք ոչնչացնել ձեր կառույցի հեղինակությունը և տարիների ձեռքբերումները: Չի կարելի նման սուտ մատնություններով մարդկանց հասցնել կալանքի: Այս ամեն ինչը ժամանակավոր է», - նշել է փաստաբանը:

ՀՐԱՆՏ ՍԱՐԱՖՅԱՆ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝