Զանգվածային ցույցեր են անցկացվում

Այսօր Սերբիայի Նովի Սադ քաղաքում հավաքվել են հազարավոր մարդիկ՝ հարգելու մեկ տարի առաջ երկաթուղային կայարանում տեղի ունեցած աղետի զոհերի հիշատակը, տեղեկացնում է Associated Press-ը:

Աղբյուրը հիշեցնում է, որ կայարանում բետոնե ծածկի փլուզման հետևանքով զոհվել էր 16 մարդ՝ 6-74 տարեկան, և այս կապակցությամբ անցկացված հավաք դարձել է նաև «ավտորիտար նախագահ Ալեքսանդր Վուչիչի կառավարության հանդեպ բուռն դժգոհության զանգվածային դրսևորում»:

Ողբերգությունից հետո հրաժարական էր տվել շինարարության նախկին նախարար Գորան Վեսիչը։ Նաև կայարանի վերակառուցմանը մասնակցած ևս 12 անձինք ավելի ուշ ձերբակալվել էին, սակայն նրանցից ոչ ոք մինչ օրս պատասխանատվության չի ենթարկվել։

Չնայած նախարարի հրաժարականին և ձերբակալություններին՝ երկրում բողոքի ալիք է բարձրացել, որը եղել է 1996 թվականից ի վեր ամենամեծը: Ցուցարարները Նովի Սադի ողբերգության պատճառ են համարում կոռուպցիան, անփութությունը, շինարարության ընթացքում անվտանգության կանոնների անտեսումը և բարեկամական կապերը սերբական իշխանության վերնախավում:

ԵՄ ընդլայնման, արևելյան հարևանության և վերակառուցման հարցերով եվրահանձնակատար Մարթա Կոսը սոցիալական ցանցերում գրել է. «Կայարանում տեղի ունեցած ողբերգությունը փոխում է Սերբիան։ Այն զանգվածներին մղում է պայքարելու հաշվետվողականության, խոսքի ազատության և ներառական ժողովրդավարության համար։ Այս նույն արժեքները Սերբիային կբերեն Եվրամիություն»:

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝