Լրիվ «գժական է գնում». ԶԱՐՄԱՆՔ

Կառավարության աշխատակազմի ղեկավար ԱՐԱՅԻԿ ՀԱՐՈՒԹՅՈՒՆՅԱՆԸ, որը ժամանակին «Աղոթք չառաջարկե՛լ, լավ աղոթել, եկել եմ» հոգնական պաստառով ակցիաներ էր անում, հայտարարել է, թե 2020 թվականին, երբ հանդիպել է Ամենայն հայոց կաթողիկոսի հետ, շատ վատ տպավորություններ է ստացել, դրանից հետո էլ չի ուզել հանդիպել նրա հետ... Թե ինչպե՞ս է աղոթքը հեգնողը հիմա գնահատականներ հնչեցնում կաթողիկոսի հասցեին, սա արդեն զարմանալի էլ չէ, լրիվ աբսուրդի ժանրից է: «Ա՛յ, ստախոս ու ձայնագրություններով մարդկանց հետ խոսող վախկոտ, ես քո նմանի հետ հանդիպելը համարում եմ իմ գործած ամենազզվելի սխալը...Քո նման «տղու» հետ շփվելը նողկալի էր...Իսկ Գարեգին Բ-ին դու շատ մեծ լավություն արեցիր, որ անկեղծացար, թե շատ վատ տպավորություն ես ստացել նրանից... Դու շարունակիր ծաղրել աղոթքը...Ինչքան մեղկ կլիներ Գարեգին Բ-ն, եթե դու նրանից լավ տպավորություն ոնենայիր, ա՛յ ողորմելի եսիմինչ...Դու գնա կարաբինայանման կերպարների եւ այլ այլասերվածների հետ հանդիպի ու դրական տպավորություններ ստացի...», - գրել է Շիրակի պետական համալսարանի պատմության եւ փիլիսոփայության ամբիոնի դասախոս, քաղաքագետ Գագիկ Համբարյանը:

Ճեպազրուցի ժամանակ լրագրողների հիշեցմանը, որ իրենց իշխանության օրոք մենք տարածքային կորուստներ ենք ունեցել, մասնավորապես, Ջերմուկի հատվածում, ՀՀ աշխատանքի եւ սոցիալական հարցերի նախարար ԱՐՍԵՆ ԹՈՐՈՍՅԱՆՆ արձագանքել է. «Եթե հարձակվել են մեր վրա ու տարածքներ են օկուպացրել, դա իմ մե՞ղքն է։ Դա իշխանության մեղքը չի, դա մեր պետության վրա հարձակում է եղել, որին մենք դիմադրել ենք եւ հարյուրավոր մեր զինծառայողներ մահացել են դրա համար»։ Ուրեմն, ըստ Թորոսյանի տրամաբանության, եթե պետության վրա հարձակվում են, իշխանությունը «մեղավոր» չէ, որովհետեւ… հարձակվել են։ Իսկ մի՞թե հենց իշխանության պարտականությունը չէ՝ ապահովել երկրի պաշտպանունակությունը, կանխել նման հարձակումները եւ թույլ չտալ, որ հարյուրավոր զինծառայողներ մահանան եւ տարածքներ հանձնվեն։ Թորոսյանի խոսքից ստացվում է՝ մեղավոր չկա, պատասխանատու՝ նույնպես։ Պարզապես մի օր արթնացանք՝ հարձակում էր, կորուստներ կային, եւ բոլորս պետք է ընդունենք դա որպես բնական աղետ:

Իսկ ահա կարգալույծ հռչակված ՍՏԵՓԱՆ ԱՍԱՏՐՅԱՆԸ լրիվ «գժական է գնում»: Վերջինս փոխել է Հովհաննավանքի փականը եւ թույլ չի տալիս իրական հոգեւորականների մուտքը եկեղեցի: «Այս արարքի մեջ ակնհայտ է ինքնիրավչության հանցակազմը, քանի որ Ստեփան Ասատրյանն օրենսդրությամբ սահմանված կարգի խախտմամբ իր իրական կամ ենթադրյալ իրավունքն ինքնակամ է իրականացնում, որն էական վնաս է պատճառել անձի կամ կազմակերպության իրավունքներին, ազատություններին կամ օրինական շահերին կամ հասարակության կամ պետության օրինական շահերին: Տվյալ դեպքում վնասը պատճառվում է այլ քահանաներին, ովքեր կարող են մուտք գործել այնտեղ, սակայն Ասատրյանի արարքից հետո, զրկվել են նման հնարավորությունից, ինչպես նաեւ վնաս է պատճառվում Հայ Առաքելական Եկեղեցուն, որի սեփականությունն է հանդիսանում այդ եկեղեցին, եւ որից չի կարող օգտվել սեփականատերը: Նաեւ խախտվում են այն անձանց իրավունքները, ովքեր ունեին մկրտություն, պսակադրություն կամ այլ արարողություն, եւ փականը փոխելու պատճառով չեն կարողացել դա իրականացնել: Քանի որ վնասը պատճառվում է իրավունքին, այստեղ գումարային ցուցնիշը պետք չէ, միայն իրավունքի խախտման փաստը բավարար է: Հետեւաբար, առկա է ՀՀ քրեական օրենսգրքի 460-րդ հոդվածով նախատեսված ավարտված հանցագործություն», - պարզաբանել է փաստաբան Դավիթ Թումասյանը:

ԶԱՐՄԱՑԱԾ Է «ԻՐԱՎՈՒՆՔ»-Ը

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝