Ստեփան Ասատրյանի կողմից մատուցված «Պատարագը» ծանր հանցանք է ընդդեմ Սուրբ Եկեղեցու կարգերի և հոգևոր միասնության. Տեր Վրթանես

«Սիրելի՛ հավատացյալ ժողովուրդ,

 

Խոր ցավով տեղեկացանք, որ կարգալույծ նախկին հոգևորական Ստեփան Ասատրյանը, անտեսելով Սուրբ Եկեղեցու կանոնները և Մայր Աթոռ Սուրբ Էջմիածնի կողմից սահմանված կարգադրությունները, շարունակում ինքնիրավչությամբ զբաղվել Հովհաննավանքում։ Հովհաննավանքը հանդիսանում է Հայ Առաքելական Սուրբ Եկեղեցու սեփականություն, և այնտեղ ապօրինի ծիսակատարություն մատուցելը ոչ միայն եկեղեցական կանոնների կոպիտ խախտում է, այլ նաև` հանցագործություն։

 

Ավելի ցավալի է, որ այդ հակաեկեղեցական և ապօրինի գործողությունը տեղի է ունեցել պետական բարձր պաշտոնյայի՝ վարչապետ Նիկոլ Փաշինյանի ներկայությամբ և հովանավորչությամբ, ինչը խորապես մտահոգիչ նախադեպ է՝ հակասող ինչպես մեր եկեղեցական կարգերին, այնպես էլ Հայաստանի Հանրապետության Սահմանադրությամբ ամրագրված եկեղեցու և պետության տարանջատման սկզբունքին։

 

Հայ Առաքելական Սուրբ Եկեղեցու կանոնական իրավունքի համաձայն՝ կարգալուծված հոգևորականը զրկվում է ցանկացած եկեղեցական ծառայություն կատարելու իրավունքից։ Նրա կողմից մատուցված Պատարագը հակականոնական, անօրինական և ծանր հանցանք է ընդդեմ Սուրբ Եկեղեցու կարգերի և հոգևոր միասնության։ Ավետարանական խոսքը հիշեցնում է․ «Ամեն բան թող լինի կարգով և արժանավայել» (Ա Կորնթացիներ 14․40)։ Այդ կարգը խախտելը հավասար է եկեղեցու միության խզման փորձին և հնազանդության ու խոնարհության մերժմանը՝ որոնք քրիստոնեական կյանքի հիմքերն են։

 

Հովհաննավանքը, որպես Հայ Առաքելական Եկեղեցու սեփականություն, գտնվում է թեմակալ առաջնորդի տնօրինության ներքո։ Որևէ անձի կողմից առանց եկեղեցական թույլտվության մուտք գործելն ու ծես մատուցելը հանդիսանում է սեփականատիրոջ իրավունքի խախտում, և կրոնական կազմակերպության ներքին գործերին պետական միջամտություն։ Այսպիսի գործողությունը հակասում է ՀՀ Սահմանադրության 41-րդ հոդվածին, և «Կրոնի ազատության և կրոնական կազմակերպությունների մասին» օրենքի 3-րդ հոդվածին, որոնք պարտադրում են պետության չեզոքություն և եկեղեցու ներքին կյանքի նկատմամբ չմիջամտություն։

 

Սիրելինե՛ր, եկե՛ք աղոթքով ու սիրով կանգնենք Սուրբ Եկեղեցու կողքին։ Մեր միասնությունը և հնազանդությունը հայրապետական գահին ու եկեղեցական իշխանությանը, որ պահապան են մեր հավատքի մաքրությանը և ազգային ինքնությանը։ Թող ամեն մի փորձ՝ խաթարելու Եկեղեցու միությունը կամ անտեսելու նրա կանոնական կարգը, վերածվի հավատի զորացման առիթի։ Թող Տերը խաղաղեցնի նրանց սրտերը, որոնք խավարում են գործում՝ կարծելով, թե լույսի մեջ են. ամեն»։