Գերմանիան Հայաստանին 84,6 միլիոն եվրոյի աջակցություն կտրամադրի՝ դրամաշնորհի և վարկի տեսքով

Հայաստանը Գերմանիայից կստանա 84,6 միլիոն եվրոյի ֆինանսական աջակցություն, որի մի մասը կտրամադրվի որպես դրամաշնորհ, իսկ մյուս մասը՝ որպես վարկային միջոց։ «Արմենպրես»-ի հաղորդմամբ՝ Ազգային ժողովում այս մասին հայտարարեց Հայաստանի էկոնոմիկայի նախարար Գևորգ Պապոյանը՝ ներկայացնելով համապատասխան նախագիծը։

Նա նշեց, որ Հայաստանի և Գերմանիայի կառավարությունների միջև համագործակցության համաձայնագրի գործընթացը սկսվել է դեռևս 2023 թվականին՝ Երևանում կայացած միջկառավարական հանձնաժողովի համատեղ նիստի ընթացքում։

«Գերմանիայի կողմից Հայաստանին կտրամադրվեն 84,6 միլիոն եվրոյի ֆինանսական միջոցներ, որից 18,6 միլիոն եվրոն գրանտային, իսկ 66 միլիոնը՝ վարկային միջոցներ են։ Վարկային բաղադրիչը նույնպես բավականին շահավետ է՝ առաջին փուլով 26 միլիոն եվրոյի վարկը կտրվի 0,9 տոկոսով, իսկ երկրորդ փուլով 40 միլիոն եվրոն՝ 0,82 տոկոսով»,- նշեց նախարարը։

Պապոյանի խոսքով՝ վարկային միջոցների կառավարումը կիրականացնի Հայաստանի Կենտրոնական բանկը՝ Գերմանիայի վերակառուցման վարկերի բանկի (KfW) հետ կնքված համաձայնագրի շրջանակում։ ԿԲ-ն այդ գումարները վարկային ծրագրերով կհանձնարարի առևտրային բանկերին, որոնք էլ կտրամադրեն վարկեր փոքր և միջին ձեռնարկություններին (ՓՄՁ)՝ էներգաարդյունավետության և արտադրական արդիականացման նպատակներով։

«Վարկային միջոցները կօգտագործվեն էներգաարդյունավետ սարքավորումների ձեռքբերման, շենքերի ջերմամեկուսացման, ջեռուցման և օդորակման համակարգերի արդիականացման, լուսավորության համակարգերի բարելավման, արևային պանելների և կուտակիչների տեղադրման համար։ Եթե նախորդ փուլում շեշտը դրված էր արևային պանելների վրա, ապա այժմ հիմնական ուշադրությունը կենտրոնացված է էներգիայի կուտակիչների համակարգերի վրա»,– ընդգծեց նախարարը։

Նրա խոսքով՝ այս ծրագրի միջոցով հնարավորություն կստեղծվի փոքր և միջին բիզնեսների համար՝ կիրառել էներգախնայող լուծումներ, նվազեցնել էլեկտրաէներգիայի ծախսը և զարգացնել կանաչ տեխնոլոգիաները։

Նախարարը նաև տեղեկացրել է, որ հաջորդ շաբաթ Բեռլինում տեղի կունենա Հայաստան-Գերմանիա միջկառավարական հանձնաժողովի հերթական նիստը։

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝