Ես էլ եմ միանում իմ հոգեւոր եղբայրների արդար, անձնվեր պայքարին՝ հանուն խաղաղության. Տեր Վաչագան

Սիրելի գործող ու չգործող հոգևոր հայրեր, դուք իրապես հավատու՞մ եք, որ մեր երկրին կարող է խաղաղություն բերել մի մարդ, ով չի՛ կարողանում անգամ իր ներսում հաստատել խաղաղություն, ով չի՛ կանգնեցրել 44-օրյա պատերազմը, որ իր անունը չարատավորվի... Քանի դեռ շատ ուշ չէ, բացեք ձեր մտքի աչքերը, և տեսեք, որ սա ընդամենը թուրք-ադրբեջանական տանդեմի տնային հանձնարարականի մի էջն է: Նրանք անընդհատ հիշեցնում են, որ Հայոց Եկեղեցին խոչընդոտում է իրենց ծրագրերին, որովհետև Վեհափառը շարունակում է խոսել Արցախի և արցախցու մասին, իսկ իրականում Արցախը ընդամենը մի պարան էր մեր երկրի վզին, որից ներկա իշխանությունը հաջողությամբ ձերբազատվեց և ձեր ողորմելի օգնությամբ փորձ է անում ազատվել «վերջին թոկից»:

 

Քանի ուշ չէ, կանգ առեք, այլապես դուք լավագույն դեպքում կհամալրեք Իսրայելի այն սուտ մարգարեների շարքը, ովքեր օրվա թագավորին ի հաճություն, քարոզում էին մոտալուտ խաղաղության մասին. «Իմ ժողովրդի դստեր վերքը նրանք բուժում էին արհամարհանքով և ասում. «Խաղաղությո՜ւն է, խաղաղությո՜ւն», մինչդեռ խաղաղություն չկար» (ԵՐԵՄ: 8:11):

 

Ուստի` ես միանում եմ նկարի աջակողմյան իմ հոգևոր եղբայրներին, ովքեր գիտեին, թե ինչպես է հաստատվում իրական ու արժանապատիվ խաղաղությունը և հանուն դրա չխնայեցին իրենց կյանքը», - գրել է Արժանապատիվ ՏԵՐ ՎԱՉԱԳԱՆ քահանա ԳՅՈՒՐՋՅԱՆԸ: