Վստահ եմ՝ Եղիշե Մելիքյանի հետ հավաքականը կլինի ավելի ուժեղ. Վահան Բիչախչյան

Աշխարհի 2026 թվականի առաջնության եվրոպական գոտու որակավորման փուլի երրորդ տուրում Հայաստանի ազգային հավաքականը Բուդապեշտի «Պուշկաշ Արենա» մարզադաշտում կհյուրընկալվի Հունգարիայի ընտրանուն։

 Հայաստանի ազգային հավաքականի և լեհական «Լեգիայի» կիսապաշտպան Վահան Բիչախչյանը պատասխանել է լրագրողների հարցերին.

«Հունգարիան լավ հավաքական է, մեր խմբում բոլորը ուժեղ են։ Բոլոր խաղերն էլ դժվար են լինելու, մեզ սպասվում են ծանր հանդիպումներ, բայց լավ ենք պատրաստվել, և թիմում ուրախ մթնոլորտ է տիրում։

Կարող եմ ասել, որ թիմը գտնվում է շատ լավ վիճակում։ Եկել ենք Բուդապեշտ, որ խաղանք լավ ֆուտբոլ, անմնացորդ նվիրվենք ու հասնենք դրական արդյունքի։

Շատ լավ ենք ուսումնասիրել Հունգարիայի հավաքականին։ Ինչ վերաբերում է հակառակորդի բացակայող ֆուտբոլիստներին՝ կարող եմ ասել, որ ավելի շատ կենտրոնանալու ենք մեր խաղի վրա։ Ունենք մեր ծրագիրը, և հուսով եմ՝ կկարողանանք այն լիովին օգտագործել վաղը։ Կներդնենք բոլոր ուժերը խաղադաշտում ու կխաղանք այն ֆուտբոլը, որը մենք ենք ուզում, և հաստատ խնդիրներ կստեղծենք հակառակորդի համար։

Թիմում շատ լավ մթնոլորտ է։ Նոր մարզիչը եկել է էներգիայով ու հավատով լի, ինչը փոխանցվում է մեզ։ Հուսով եմ՝ վաղը կկարողանանք ցուցադրել այն մակարդակը, որը ցուցադրեցինք Իռլանդիայի դեմ հանդիպմանը։

Ժամանակ է պետք, որ մարզիչը կարողանա լիովին փոխանցել իր մտքերն ու ցանկությունները մեզ, բայց ամեն ինչ շատ լավ է ընթանում։ Կարող եմ ասել, որ մինչև այսօր հասցրել ենք իրար ճանաչել, և  վստահ եմ՝ մեր նոր մարզչի հետ հավաքականը ավելի լավ տեսք կունենա, կլինի ավելի ուժեղ և կհասնենք մեր առջև դրված նպատակներին»,- ասել է Բիչախչյանը։

ԱԱ-2026-ի եվրոպական գոտու որակավորման փուլի F խմբի երրորդ տուրի Հունգարիա – Հայաստան հանդիպումը կկայանա հոկտեմբերի 11-ին՝ Երևանի ժամանակով 20:00-ին։

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝