Ազգային փոքրամասնությունների օրն այս տարի հետաքրքիր կերպով նշվեց Ապարանում

Հոկտեմբերի 5-ին Ապարանի մշակույթի կենտրոնում կայացավ «Տանիքը՝ Հայաստան» խորագրով ամենամյա մշակութային միջոցառումը, որը նվիրված էր Հայաստանի ազգային փոքրամասնություններին։

Այս տարվա միջոցառումը համախմբել էր մշակութային և խոհանոցային երկու հիմնական ուղղություն՝ ընդգծելով համայնքների բազմազանությունն ու իրենց ավանդույթների հարատևությունը։

Ապարանի մշակույթի կենտրոնի դահլիճում անցկացվեց համերգային ծրագիրը, որտեղ ազգային փոքրամասնությունների ներկայացուցիչները ներկայացրեցին երաժշտական և պարային կատարումներ՝ ծափահարությունների ներքո։ Միջոցառման ընթացքում հնչեցին հայկական, ռուսական, եզդիական, հունական, ասորական և այլ համայնքների ազգային մեղեդիներ, իսկ բեմում հագեցած գույներով ու շարժումներով միահյուսվեցին տարբեր մշակույթներ։

Համերգային բաժնին հաջորդեց ազգային խոհանոցների ցուցադրությունը․ հատուկ ձևավորված գաստրոզոնայում համայնքների ներկայացուցիչները հյուրասիրեցին ինչպես նախապես պատրաստված, այնպես էլ տեղում պատրաստվող ավանդական ուտեստներ՝ պատմելով դրանց ծագման և պատրաստման գաղտնիքների մասին։ Տարբեր ներկայացուցիչների մեկ հարկի ներքո համախմբող այս միջոցառումը  ևս մեկ անգամ ընդգծեց Հայաստանի ազգային փոքրամասնությունների հարուստ մշակութային ժառանգությունը։

Միջոցառմանը մասնակցեցին Հայաստանի ասորական, հրեական, հունական, եզդիական, գերմանական, ռուսական, բելառուսական, ուկրաինական, վրացական, քրդական և լեհական համայնքները։

Նախագիծն իրականացվել է Հայաստանի պետական ֆիլհարմոնիայի կողմից՝ ՀՀ կառավարության աջակցությամբ և ազգային փոքրամասնությունների 11 համայնքների համագործակցությամբ։

Դիանա Մանուկյան 

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝