«ԶՈՀՎԵԼ է ՀԵՐՈՍԱԲԱՐ ԱՆՕԴԱՉՈՒ ԹՌՉՈՂ ՍԱՐՔԻ ՀԱՐՎԱԾԻՑ» ԱՆՄԱՀ ՀԵՐՈՍ ԷԴՄՈՆ ՄՆԱՑԱԿԱՆՅԱՆ

2020 թվականի Արցախյան 44-օրյա ահաբեկչական պատերազմի ծանր ու դժնդակ օրերին, ցավոք կորցրեցինք հազարավոր լուսավոր երիտասարդների, ովքեր մեր ապագան էին, պիտի ընտանիքներ կազմեին ու մեր ազգը շատացնեին։

Ցավոք, այդ զոհերից մեկն էլ տանկիստ - մեխանիկ ԷԴՄՈՆ ԱՐՏԱԿԻ ՄՆԱՑԱԿԱՆՅԱՆՆ էր։

Այսօր, հոկտեմբերի 2-ը նրա հիշատակի օրն է, ուղիղ 5 տարի է անցել, սակայն ցավը մնում է ցավ ու երբեք չի սպիանում։ Անմահ հերոսի հուշարձանին են այցելել հարազատներ, ընկերներ, որդեկորույս ծնողներ, ծաղիկներ խոնարհել ու խնկարկել։

Էդմոնի հարազատը, բռնցքամարտիկ ՋԱՆԻԿ ՍԱՀԱԿՅԱՆԸ, Iravunk. com -ի հետ զրույցում, խորը ցավը սրտում նշեց.

«Էդմոնը ծնվել է 2001 թվականի փետրվարի 10-ին, Կոտայքի մարզի Աբովյան քաղաքում։ Փոքր տարիքից զբաղվել է սպորտով, հաճախել է ֆուտբոլի, կարատեի ու լողի։Սովորել է Աբովյանի թիվ 10 միջնակարգ դպրոցում, իսկ հետո թիվ 4 ավագ դպրոցում։ 2019֊ին ընդունվել է Հայաստանի Ազգային ագրարային համալսարան։ Նույն թվականից ծառայության է անցել Արմավիրում, հետո Կուբաթլույում։ Էդմոնը շատ խելացի էր, նա շատ կարճ ժամանակահատվածում տիրապետել է իր զինվորական մասնագիտությանը, դարձել ուսման մեջ առաջատար ու շատ կարգապահ մարտիկ։ Մարտական պատրաստության ժամանակ ցուցաբերել է բարձր ցուցանիշներ, նա տանկիստ ֊մեխանիկ էր։ Իր զինվորական կոլեկտիվում վայելել է արժանի հեղինակություն։ 2020 թվականի սեպտեմբերի 27-ից թեժ մարտեր է մղել նենգ ոսոխի դեմ, պատերազմի ամենաթեժ կետերում, լինելով առաջնագծում։ Շուրջ 6 ամիս անհայտության մեջ մնալուց հետո, մարմինը գտնվել է ապրիլի 5-ին։ Հերոսաբար զոհվել է անօդաչու թռչող սարքի հարվածից, հոկտեմբերի 2-ին Ջրականի թեժ մարտերի ժամանակ, երբ գնացել էր մարտական ընկերներին օգնության։ Նշեմ, որ եղբայրս Արթուր Սահակյանը բռնցքամարտիկ է, նա իր բոլոր հաղթանակները նվիրում է Էդմոնի պայծառ հիշատակին, միշտ ռինգ է դուրս գալիս այն շապիկով, որի վրա պատկերված է Էդմոնի նկարը։ Նա այս տարվա հունիսին Վրաստանում կայացած միջազգային մրցաշարում հաղթեց թուրք մրցակցին ու այդ հաղթանակը ևս նվիրեց Էդմոնի հիշատակին։

ՀԱՎԵՐԺ ՓԱՌՔ ՄԵՐ ԲՈԼՈՐ ԱՆՄԱՀ ՀԵՐՈՍՆԵՐԻՆ...

Պատրաստեց ՀՈՎՀԱՆՆԵՍ ՍԱՐԳՍՅԱՆԸ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝