Ընդգծված հակառուսական քաղաքականություն են որդեգրել` ակնկալելով, որ դա կհանգեցնի Եվրամիության հետ մերձեցման

Ռուսաստանի փոխվարչապետ Ալեքսեյ Օվերչուկը  հայտնել էր, որ մինչև տարեվերջ երկու երկրների միջև ապրանքաշրջանառությունը նախորդ տարվա համեմատ երկու անգամ կնվազի: Եթե անցյալ տարի այն կազմել է 12,4 մլրդ դոլար, ապա այս տարի կլինի մոտ վեց միլիարդ։ Բացի այդ, առաջին կիսամյակում երկրների միջև առևտրի ծավալը կազմել է մոտ 3,4 միլիարդ դոլար, ինչը երկու անգամ քիչ է 2024 թվականի նույն ժամանակահատվածի համեմատ։

Տնտեսագետ Նաիրի Սարգսյանի դիտարկմամբ.

-Առևտրի կրճատումն ազդել է այնպիսի ուղղությունների վրա, ինչպիսիք են Հայաստանից մարդատար ավտոմեքենաների արտահանումը, երկակի նշանակության ապրանքների, հայկական ալկոհոլային արտադրանքի արտահանումը ՌԴ, ինչպես նաև Ռուսաստանից հեղուկացված բնական գազի ներկրման կրճատումը: Իհարկե, կան նաև Վրաստանի հետ կապված օբյեկտիվ գործոններ, բայց առևտրի անկումը հիմնականում կապված է Հայաստանի կառավարության անգործության կամ մինչև վերջ չհաշվարկված քայլերի հետ։ Վերջին 2-3 տարվա ընթացքում Հայաստանի տնտեսությունը և մասնավորապես արտաքին առևտուրը մեծամասամբ աճել է ՌԴ ապրանքների վերարտահանման հաշվին` Ռուսաստանի դեմ Արևմուտքի պատժամիջոցների ֆոնին:

Սակայն իշխանությունները հետագայում որոշակի որոշումներ կայացրին` խնդիրներ ստեղծելով սեփական տնտեսության համար։ Վառ օրինակ է Ռուսաստան ավտոմեքենաների վերարտահանման ժամանակ հարկերի վերադարձը։ Այնուհետև Երևանը դրամական փոխանցումների հետ կապված արհեստական խնդիրներ ստեղծեց, ինչը մեծապես դժվարացրեց հայկական ընկերությունների աշխատանքը ռուս և եվրոպացի գործընկերների հետ։

Վերջինիս պնդմամբ.

-Հայաստանի իշխանություններն ընդգծված հակառուսական քաղաքականություն են որդեգրել` ակնկալելով, որ դա կհանգեցնի Եվրամիության հետ մերձեցման։ Ոչ մի շոշափելի մերձեցում իրականում չկա, բայց հայկական տնտեսությանը վնաս է հասցվել։ Նման ճնշող վիճակագրությունն անպայման ազդելու է հասարակ քաղաքացիների կենսամակարդակի վրա և բարձրացնելու է աղքատության ու գործազրկության մակարդակը Հայաստանում:

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝