Ռեկորդային կարիերաս կավարտեմ այն օրը, երբ մեկ մատով քաշեմ ինքնաթիռ․Յուրի Սաքունցը՝ հաղթական կարիերայի ու անցած դժվարությունների մասին

Սպորտ 27 Սեպտեմբեր, 2025 12:49

Ուժային եռամարտի, աշխարհի կրկնակի ու Եվրոպայի չեմպիոն, ինչպես նաև գինեսի բազմակի ռեկորդակիր Յուրի Սաքունցը Փրկարարի օրը համալրեց է իր ռեկորդների շարքը։ Յուրի Սաքունցը մարզիկ է, որի անունը վաղուց ընդգրկվել է սպորտի պատմության էջերում։ Նա ուժային եռամարտի կրկնակի աշխարհի չեմպիոն է, ինչպես նաև բռնցքամարտի աշխարհի և Եվրոպայի առաջնությունների հաղթող։ Բացի այդ, նա նվաճել է համաշխարհային ձեռնամարտի և Եվրոպայի ուժային ըմբշամարտի չեմպիոնի տիտղոսները։ Նրա բացառիկ նվաճումները վավերացվել են Գինեսի ռեկորդների գրքում՝ ութ անգամ արժանանալով համաշխարհային ճանաչման։

Ե՞րբ է առաջին անգամ մարզիկը զգացել, որ տիրապետում է գերբնական ուժի, որն՞ է եղել նրա առաջին ռեկորդը, ի՞նչ է զգում ամեն անգամ հերթական ռոկորդը սահմանելիս, ունեցել արդյոք ձախողումներ այս եւ այլ հարցերի շուրջ զրուցել ենք Գինեսի ռեկորդակիր Յուրի Սաքունցին․

-Վեց տարեկանից զբաղվել եմ սպորտով, առաջին քայլերս կատարել եմ հայրիկիս մոտ՝ բարբա եմ պարապել։ Առաջին ռեկորդս սահմանել եմ 16 տարեկանում՝ երեք ֆուտբոլի գնդակի վրա հենում-ծալում վարժություն եմ արել մեկ րոպեում 51 անգամ։ Հետո մատի ճկույթով քաել եմ երկու տոննա քաշ ունեցող մեքենա, հետո երեք ու այդպես գնալով ավելացրել եմ։

-Ձեր ընտանիքում եղե՞լ են ռեկորդակիրներ։

-Չէ, ես առաջինն եմ, լավ նվաճումներով հայտնի մարզիկներ ունեցել ենք, բայց Գինեսի ռոկորդակիր՝ ոչ։

-Ինչպե՞ս հասկացաք, որ տիրապետում եք նման հատկությունների, ներքին զգացողությունների մասին մի փոքր խոսենք։

-Երբ առաջին անգամ քաշեցի մեքենան ստացվեց՝ ես դա համարեցի նշան ի վերուստ, որ ես պետք է նորից փորձեմ ու գուցե դա է իմ հետագա գործունեության ուղղին։ Ու, այո, հասկացա, որ ամենին ինչին հասել ու հասնում եմ դա կատարվում է բացառապես Աստծո զորությամբ։ Այս ընթացքում հասցրել եմ 25 եւ ավել ռեկորդ սահմանել ու ամենը Աստծո զորությամբ։

-Որն՞ էր ամենադժվար ռեկորդը, որը բացահայտում էր նաեւ Ձեզ համար։

-Առաջինը դա մետրոյի վագոններ քաշելն էր, որը ինձ համար եւս, այո, բացահայտում էր։

-Ի՞նչ է կատարվում Ձեզ հետ ռեկորդը սահմանելու պահին ու դրանից հետո, նույն Յուրիներն են մնում, թե՞

-Ռեկորդը սահմանելու պահին ներքին անհանգստությունը, լարվածությունը միախառնվում են իրար, իսկ արդեն սահմանելուց հետո անբնական հանգստություն, թեթեւություն եմ ապրում, թե չէ ես մնացած առումներով երբեք Յուրին չի փոխվում։

-Պարոն Սաքունց, անգամ համաշխարհային ճանաչում ունեցող մարզիկները խոստովանել են, որ ամեն անգամ ռինգ դուրս գալիս մտավախություն են ունենում՝ գուցե ձախողենք։ Դուք նման մտավախություններ ունեցե՞լ եք։

-Անկեղծ, այո, ավելին ասեմ մի քանի օր առաջ Աբովյանում կատարած ռեկորդս երեք անգամ ձախողել եմ։

-Որն՞ էր դա։

-Մեկ մատով միանգամից 4 ֆուռ պետք է քաշեի՝ մոտավորապես 70 տոննա, առաջին երկրորդ անգամ չստացվեց, ու միայն երրորդ փորձից ստցավեց։ Այդ ձախողումներին ոչ ես էի սպասում, ոչ ընկերներս։

-Իսկ ի՞նչ էիք զգում առաջին երկու ձախողումների ընթացքում։

-Լավ հարց էր, առաջին ձախողումնս, ինչքան էլ զարմանալի հնչի, ինձ ուժ տվեց, որպեսզի դա ինձ չկոտրի։ Ձախողումն էլ ասեմ որն էր, պարանն էր կտրվում, բայց դա էլ էր էլի ձախողում։

-Ասում են, յուրաքանչյուր հաղթական ճանապարհից պետք է ժամանակին հետ կանգնել, որպեսզի անցած հաղթանակներդ չհավասարվեն ջրին, Դուք ունե՞ք որոշում, թե երբ կավարտեք Ձեր ռոկորդային կարիերան։

-Շատ ճիշտ եք ասում, այո, ես իմ ռեկորդային կարիերան կավարտեմ այն օրը, երբ մեկ մատով քաշեմ ինքնաթիռ։

-Եվ վերջում, ռեկորդակիր ծնվո՞ւմ են․ թե՞ դառնում։

-Կարծում եմ ծնվում են 10 տոկոսը, իսկ մնացած 90 տոկոսը դառնում են։

-Դուք դարձե՞լ եք, թե՞ ծնվել։

-Կարծում եմ դարձել եմ։ Ծնվել եմ, երբ մեկ մատով կարողացել եմ քաշել երեք տոննա, բայց հետո արդեն դարձել եմ՝ քաշելով 60 տոննա։

Հավանեցի՞ր հոդվածը, կիսվիր ընկերներիդ հետ՝

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝

Ռեկորդային կարիերաս կավարտեմ այն օրը, երբ մեկ մատով քաշեմ ինքնաթիռ․Յուրի Սաքունցը՝ հաղթական կարիերայի ու անցած դժվարությունների մասին

Փոխարժեք