Երբ թվում էր այլեւս անհնար է առաջ շարժվելը՝ Աստված ինձ ուժ տվեց նորից վեր կանգնելու ու հաղթելու․ Մալախասը՝ աշխարհի կրկնակի չեմպիոն դառնալու բարդ ճանապարհի մասին

Խորվաթիայի մայրաքաղաքում անցկացված հունահռոմեական ոճի ըմբշամարտի աշխարհի առաջնությունում Մալխաս Ամոյանը փառահեղ հաղթանակով մարզական կարիերայում երկրորդ անգամ նվաճեց չեմպիոնի տիտղոսը: 77 կգ քաշայինների եզրափակիչում Ամոյանը 9:1 հաշվով պարտության մատնեց Փարիզի Օլիմպիական խաղերի չեմպիոն, ճապոնացի Նաո Կուսակային: Մինչեւ եզրափակիչ, Ամոյանը 4 հաղթական գոտեմարտ է անցկացրել Զագրեբի մրցագորգում՝ Քամալ Բեյի (ԱՄՆ, 1/16 եզրափակիչ, 2:1), Մատեուս Բերնատեկի (Լեհաստան, 1/8 եզրափակիչ, 10:0), Ահմեդ Յիլմազի (Թուրքիա, քառորդ եզրափակիչ, 3:1) եւ Ալիրեզա Աբդեվալիի (Իրան, կիսաեզրափակիչ, 5:1):

Աննկարագրելի դժվար ճանապարհ եմ անցել աշխարհ կրկնակի չեմպիոն հռչակվելու համար, այս ոսկե մեդալը իմ հաղթական ճանապարհի անխոս վկան է։ Ամեն անգամ դժվարության հանդիպելիս, երբ թվում էր այլեւս անհնար է առաջ շարժվելը՝ Աստված ինձ ուժ տալիս նորից վեր կանգնելու։ Իմ հաղթանակների մեջ բոլորն իրենց ներդրումն ունեն՝ մարզիչներս, ծնողներս, հարազատներս ու իմ երկրպագուները,-մեզ հետ զրույցում այսպես նկարագրեց իր ապրածն ու զգացածը աշխարհի կրկնակի չեմպիոնի տիտղոսը նվաճած Մալխաս Ամոյանը։

Անդրադառնալով հաղթական վարկյաններին Մալխասը նկատում է․

-Խորվաթիա մեկնել էի ոսկե մեդալ նվաճելու նպատակով: Կուսակայի հետ ռեւանշի մասին չէի մտածում, քանի որ ինձ համար նշանակություն չուներ, թե ով կլիներ մրցակիցս: Նպատակս մեկն էր՝ դառնալ աշխարհի առաջնության հաղթող՝ կրկնակի չեմպիոն:Բոլոր գոտեմարտերս բարդ ստացվեցին, քառորդ եզրափակիչը առավել բարդ տրվեց: Արդեն եզրափակիչում ավելի լավ էի տրամադրվել: Գոտեմարտեցի ճապոնացի ըմբիշի հետ, որին պարտվել էի Օլիմպիական խաղերում: Այդ պարտությունն ինձ համար շատ ցավոտ էր: Օլիմպիական չեմպիոնին հաղթեցի ճիշտ մարզումների, լավ մարզավիճակում գտնվելու շնորհիվ, որոնք ինձ օգնեցին լավ գոտեմարտ վարել եւ հաղթել: Օլիմպիական խաղերում ճապոնացի ըմբիշին պարտվելուց հետո սկսել էի ուսումնասիրել նրան: Իրականում նրա հետ շատ դժվար է գոտեմարտել: Պարտությունից հետո շատ դժվար էր այդ ըմբիշի հետ գոտեմարտել, տրամադրվել եւ հաղթել: Եվրոպայի առաջնությունից հետո իմ մարզումները բերել էին նրան, որ ես հոգեպես արդեն պատրաստ էի նրան հաղթել: Ես կարողացա գորգի վրա հոգեպես հաղթել, հետո նոր ֆիզիկապես:

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝