«ԾԱՆՐ ՎՆԱՍՎԱԾՔՆԵՐ ԷՐ ՍՏԱՑԵԼ ՈՒ ՀԱՍՑՐԵԼ Է ԾԱՌԱՅԱԿԻՑ ԸՆԿԵՐՆԵՐԻ ԿՅԱՆՔԵՐ ՓՐԿԵԼ». ԱՆՄԱՀ ՀԵՐՈՍ ՆՈՅ ԹԵՎՈՆՅԱՆ

2020 թվականի սեպտեմբերի 27-ին ադրբեջանա - թուրքական սանձազերծած Արցախյան 44-օրյա ահաբեկչական պատերազմի ժամանակ ցավոք կորցրեցինք հազարավոր լուսավոր երիտասարդների, նրանցից մեկն էլ ՆՈՅ ԼՅՈՎԱՅԻ ԹԵՎՈՆՅԱՆՆ էր։

Սեպտեմբերի 19-ը, նրա ծննդյան օրն է, կդառնար 24 տարեկան։ Անմահ հերոսի շիրիմին են այցելել հարազատներ, ընկերներ, համագյուղացիներ, ծաղիկներ խոնարհել ու խնկարկել։ Անմահ հերոսի քույրը, Iravunk. com -ի հետ զրույցում խորը ցավը սրտում նշեց. -

«Եղբայրս ծնվել է 2001 թվականի սեպտեմբերի 19-ին, Արարատի մարզի Արալեզ գյուղում։ Մենք երեք քույրեր ենք ու Նոյը մեր մինուճար եղբայրն էր, նա կրտսերն էր։ 2007֊2019 թթ. սովորել է Արալեզի միջնակարգ դպրոցում։ 2008-2011թթ. հաճախել է Վեդիի մարզադպրոց և զբաղվել «Դուքենդո» կարատեով։ Նոյը նորագույն տեխնոլոգիաների մեծ սիրահար էր։ 2015-2019 թթ. սովորել է «Թումո» ստեղծարարական տեխնոլոգիաների կենտրոնում, նա գրանցել է բազում հաջողություններ ռոբոտաշինության ասպարեզում, արժանանալով պատվոգրերի։ Դեռ փոքրուց, եղբայրս տարբերվում էր իր տեսակով, անսահման բարի, կամեցող, ամենքի հանդեպ ուշադիր ու կարեկցող անձնավորություն էր։ Շատ մարդասեր էր, փորձում էր ամենքին օգնել։ Նույնիսկ իր դպրոցական ծախսերը կրճատում էր, որպեսզի օգնի դրսում գտնվող անտուն մարդկանց։ Նոյը, հաճախ իր հետաքրքրություններին չհամապատասխանող գրքեր էր գնում, որպեսզի օգնի դրանք վաճառող մեծահասակներին։ Նոյը շատ խելացի էր ու հասուն, երբեք չէր հանդուրժում անարդարությունը։

Եղբայրս նաև ՌԴ քաղաքացի էր, մեր ընտանիքը մի ժամանակ հանգամանքների բերումով տեղափախվել էր ՌԴ մշտական բնակության, բայց Նոյը, գիտակից տարիքում նախընտրեց վերադառնալ հայրենիք ու ծառայել։ Նա կյանքի բոլոր պլանները կապում էր միայն մայր հայրենիքի հետ։ 2019֊ին ընդունվել է Հայաստանի Ագրարային համալսարանի գյուղտեխնիկայի ավտոմատացման բաժինը։ 2020 ֊ի հունվարի 19֊ին եղբայրս զորակոչվել է Հայոց բանակ, ծառայության անցել Արցախի Մատաղիսի զորամասում, հետախուզական վաշտում, զինընկերները նրան «Ռազվեդկի պոնչ» էին ասում, դասընկերները նմանեցնում էին ազգային հերոս Ջիվան Աբրահամյանին։ Զինակից ընկերները մեզ պատմում էին, որ Նոյը շատ ընկերասեր էր, բոլորի հետ առանձնահատուկ վերաբերմունք ուներ։ Նոյը շատ պրոֆեսիոնալ է գործել պատերազմի ժամանակ։

Ինտենսիվ կրակի պատճառով, զինվորները մի քանի օր մնացել են առանց սննդի ու ջրի, թուլացել են ֆիզիկապես, Նոյը, տեսնելով, որ տղաներն այլևս չեն կարող դիմանալ, միայնակ, ինտենսիվ կրակի տակից գնում է Մատաղիսի զորամասից սնունդ բերելու ու դա նրան հաջողվում է։ Լինելով հետախույզ, ընկերների հետ կարողացել է շատ կարևոր մարտական առաջադրանք կատարել, որից կախված էր հարակից դիրքերի ամրությունը։ Նոյն իր ընկերների ու հրամանատարի հետ զոհվել է հոկտեմբերի 11-ին Վարնգաթաղի /Լուլասազ /բարձունքը պաշտպանելիս։ Նոյը, կյանքի հետ անհամատեղելի ծանր վնասվածքներ է ստացել, բայց մինչև զոհվելը հասցրել է ծառայակից ընկերների կյանքեր փրկել, ցավոք նրա կյանքը չի հաջողվել փրկել»։

ՇՆՈՐՀԱՎՈՐ ԵՐԿՆԱՅԻՆ ԾՆՈՒՆԴԴ, ԱՆՄԱՀ ՀԵՐՈՍ ։ՔՈ ՍԽՐԱՆՔՆ ԱՆՄԱՀ Է, ՔՈ ԱՆՈՒՆԸ ՄԵՐ ՍՐՏԵՐՈՒՄ... ՀԱՎԵՐԺ ՓԱՌՔ, ՄԵՐ ԲՈԼՈՐ ԱՆՄԱՀ ՀԵՐՈՍՆԵՐԻՆ։

Պատրաստեց ՀՈՎՀԱՆՆԵՍ ՍԱՐԳՍՅԱՆԸ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝