Այսօր մրցագորգ դուրս կգան Արթուր Ալեքսանյանը, Հրաչյա Պողոսյանը, Գոռ Խաչատրյանը, Մալխաս Ամոյանն էլ կպայքարի ոսկու համար

Զագրեբում անցկացվող հունահռոմեական ոճի ըմբշամարտի աշխարհի առաջնության երկրորդ մրցումային օրը Հայաստանի հավաքականից այսօր մրցագորգ դուրս կգան Հրաչյա Պողոսյանը (60 կգ), Գոռ Խաչատրյանը (72 կգ) եւ Արթուր Ալեքսանյանը (97 կգ):

Եվրոպայի բրոնզե մեդալակիր Հրաչյա Պողոսյանը (60 կգ) որակավորման փուլում կմրցի Ուկրաինայի ներկայացուցիչ Վլասիլավ Կուզկոյի հետ:

Գոռ Խաչատրյանը (72 կգ) որակավորման փուլում կմրցի Հոնդուրասի ներկայացուցիչ Լուիս Բարիոս Ռոչեսի հետ:

Օլիմպիական խաղերի ոսկե, կրկնակի արծաթե եւ բրոնզե մեդալակիր, աշխարհի քառակի չեմպիոն, Եվրոպայի յոթակի չեմպիոն Արթուր Ալեքսանյանը կմեկնարկի 1/8 եզրափակիչից, որտեղ մրցակիցը կլինի որակավորան փուլի Աբդուլ Չեբի (Թուրքիա)- Զեյան Վան (Չինաստան) զույգի հաղթողը:

Նախնական գոտեմարտերը կմեկնարկեն Երեւանի ժամանակով 12:30-ից:

Երեկոյան մրցահերթում չեմպիոնական գոտեմարտ կանցկացնի Փարիզի Օլիմպիական խաղերի բրոնզե մեդալակիր, աշխարհի չեմպիոն, Եվրոպայի քառակի չեմպիոն Մալխաս Ամոյանը: 77 կգ քաշային կարգի եզրափակիչում Ամոյանը աշխարհի առաջնության ոսկե մեդալը կվիճարկի Փարիզի Օլիմպիական խաղերի չեմպիոն, ճապոնացի Նաո Կուսակայի հետ:

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝