Էլինա Ավանեսյանը հիվանդության պատճառով ղադար է վերցնում կարիերայում

Հայ թենիսիստուհի, աշխարհի 104-րդ ռակետ Էլինա Ավանեսյանը Instagram-ում կատարած գրառումով հայտնել է, որ հիվանդության պատճառով կարիերայում դադար է վերցնում։

«Բարև բոլորին։ Կցանկանայի մի փոքր ավելի անձնական խնդրով կիսվել ձեզ հետ, որովհետև վերջին ամիսները շատ դժվար են եղել ինձ համար։

Մարտին ինձ մոտ մոնոնուկլեոզ ախտորոշվեց։ Սկզբում լիովին չէի հասկանում, թե որքան կազդի դա ինձ վրա, բայց շուտով սկսեցի անընդհատ հոգնածություն զգալ, ուժ չունենալ, և անգամ ամենապարզ մարզումներն անհնարին էին դառնում։ Սա հատկապես դժվար էր ընդունել, որովհետև մրցաշրջանի առաջին երկու ամիսները շատ հաջող էին անցել․ ես հանդես էի գալիս բարձր մակարդակով, ինձ հիանալի մարզավիճակում էի զգում և իսկապես վայելում էի թենիսը։ Այդ ամենից անցնել դեպի լիակատար թուլություն ու անկարողություն՝ շատ հիասթափեցնող էր։

Այնուհետև Մայամիում սկսեցի լուրջ ցավեր ունենալ դաստակիս շրջանում, որոնց վերականգնումը երկար ժամանակ պահանջեց։ Երբ կարծես թե վերականգնվում էի, նորից հետընթաց եղավ՝ այս անգամ ուսի ցավով։ Այդ պահից ի վեր թվում է՝ մեկը մյուսին է հաջորդում։ Այս ֆիզիկական խնդիրները շատ դժվար են կառավարելու համար, հատկապես երբ իմ մարմինն ամբողջությամբ չի վերականգնվել հիվանդությունից։ Թվում է, թե ամեն ինչ սովորականից ավելի երկար է պահանջում բուժվելու համար, ինչը գործընթացն էլ ավելի բարդացնում է։

Ես ամեն օր աշխատում եմ իմ թիմի հետ՝ ամեն ինչ անելով, որ ապաքինվեմ, ուժերս վերականգնեմ և պատրաստվեմ կրկին 100%-ով մրցելու։ Բայց ճշմարտությունն այն է, որ այս ճանապարհը ինձ փորձեց այնպիսի ձևերով, ինչպիսիք չէի էլ սպասում։ Կային հիասթափության ու նույնիսկ կասկածի պահեր, բայց նաև շատ բան սովորեցի՝ համբերության, տոկունության մասին և այն, թե որքան եմ սիրում այս սպորտը։

Կրկին խաղերին մասնակցելը մեծ քայլ էր, բայց մրցելն առանց ինձ իսկապես դաշտում զգալու շատ բարդ է։ Ամենից շատ ինձ պակասում է իմ բարձրագույն մակարդակով պայքարելու և խաղը վայելելու հնարավորությունը, ինչպես գիտեմ՝ կարող եմ։ Դա է, որ ինձ ամեն օր մոտիվացնում է առաջ գնալու։

Սրտանց շնորհակալ եմ բոլորիդ, ովքեր շարունակում են աջակցել ինձ հաջողությունների ու դժվարությունների պահին։ Ձեր բարի խոսքերն ու քաջալերանքը ինձ ուժ են տալիս դժվար օրերին և հիշեցնում, թե ինչու եմ շարունակում պայքարել։

Հավատում եմ, սա պարզապես մեկ գլուխ է, և անհամբեր սպասում եմ կրկին դաշտ վերադառնալուն՝ առանց ցավի, առողջ և երբևէ եղածից ավելի ուժեղ»,- գրել է Ավանեսյանը։

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝