«ՀԱՂԹԵՑԻ ԱԴՐԲԵՋԱՆՑԻ ՄՐՑԱԿՑԻՍ, ՈՎ ՊԱՐՏՈՒԹՅՈՒՆԻՑ ՀԵՏՈ ՄՐՑԱԳՈՐԳՈՒՄ ԱՐՏԱՍՎՈՒՄ ԷՐ». ՀՈՒՆԱՀՌՈՄԵԱԿԱՆ ՈՃԻ ԱՆՎԱՆԻ ԸՄԲԻՇ ԳԱՍՊԱՐ ՏԵՐՏԵՐՅԱՆ

Վերջերս Բուլղարիայի Սամոկով քաղաքում կայացած հունահռոմեական ոճի ըմբշամարտի Մ20 տարեկանների Աշխարհի առաջնությունում հաջող են հանդես եկել մեր երկրի ներկայացուցիչները նվաճելով 4 մեդալ, որից 1 ոսկե, 2 արծաթե և 1 բրոնզե։ Թիմային հաշվարկում մեր հավաքականը գրավել է երկրորդ հորիզոնականը։ Ոսկե մեդալ է նվաճել անվանի ըմբիշ ԳԱՍՊԱՐ ՏԵՐՏԵՐՅԱՆԸ։

Iravunk. com -ի մարզական լրագրողը հանդիպել ու զրուցել է նրա հետ։

- Շնորհավորում ենք, Գասպար, հաղթանակի առթիվ։

- Շնորհակալ եմ։ 72 կգ քաշային կարգում եմ հանդես եկել։ Մեկնարկային գոտեմարտի ժամանակ 6։2 հաշվով հաղթեցի ադրբեջանցի մրցակցիս։ Հաջորդ գոտեմարտում 3։1 հաշվով պարտության մատնեցի Ղազախստանի ներկայացուցչին, ով Մ20 Ասիայի չեմպիոնն էր, բավականին փորձառու մրցակից։ 1/4 եզրափակչում 7։1 հաշվով հաղթեցի բուլղարացի ըմբիշին, կիսաեզրափակչում 1։1 հաշվով հաղթել եմ Հունաստանի ներկայացուցչին։ Իսկ ահա եզրափակչում ոսկե մեդալի ճանապարհին 1։1 հաշվով պարտության մատնեցի ուզբեկ մրցակցիս Կոդիրովին, նա էլ Մ20 Ասիայի չեմպիոն էր։ Անկեղծ ասած, բոլոր գոտեմարտերն էլ դժվար անցան, ու չեմ կարող որևէ մեկն առանձնացնել։ Բնական է, դժվար էր մրցագորգ դուրս գալ ու միանգամից մրցել ադրբեջանցի մրցակցի դեմ։ Շատ ուրախ եմ, որ կարողացա հաղթել հատկապես ադրբեջանցուն։ Ճիշտն ասած, արդեն սովորական է դարձել, քանի որ շատ եմ մրցել ադրբեջանցի ըմբիշների դեմ ու հաղթել։ Շատ մեծ հպարտության զգացողություններ առաջացան ինձ մոտ ոսկե մեդալ նվաճելուց հետո, շատ մեծ էր ոգևորությունը, քանի որ անցած տարի Եվրոպայի ու Աշխարհի առաջնության ժամանակ ինչ - ինչ պատճառներով չէր ստացվում նվաճել ոսկե մեդալ։ Այս հաղթանակը ինձ շատ մեծ վստահություն տվեց։ Հաղթանակս նվիրում եմ իմ հայ ազգին, մեր բոլոր զինվորներին։

- Գասպար, տեղյակ եմ, որ հուլիսին Իտալիայի Կաորլե քաղաքում մասնակցել ես նաև հունահռոմեական ոճի ըմբշամարտի Մ20 տարեկանների Եվրոպայի առաջնությանը ու արծաթե մեդալի արժանացել։

- 1/8 եզրափակչում 2։1 հաշվով հաղթել եմ հույն մրցակցիս, քառորդ եզրափակչում 9։1 հաշվով պարտության մատնեցի հունգարացի ըմբիշին, կիսաեզրափակչում 5։1 հաշվով հաղթեցի ադրբեջանցի մրցակցիս Սեյմուր Գասիմովին. նա պարտությունից հետո մրցագորգում արտասվում էր։ Եզրափակչում մրցակիցս վրացի մարզիկն էր, ես բացահայտ հաղթեցի նրան, ցավոք մրցավարները շատ անարդար գտնվեցին 4։3 հաշիվ գրանցեցին օգուտ մրցակցիս։ Նշեմ, որ այս Եվրոպայի առաջնությանը եղբայրս Սամվել Տերտերյանը, ևս մասնակցում էր, նա էլ բրոնզե մեդալ նվաճեց։ Այնպես ստացվեց, որ այս մրցաշարում միայն ես ու եղբայրս կարողացանք նվաճել մեդալ մեր երկրից։Անձնական մարզիչս Սիմոն Կարապետյանն է։ Նրա ներդրումը իսկապես մեծ է իմ գրանցած նվաճումներում։

- Գասպար, տեղյակ եմ, որ օրերս «Դինամո» մարզական համալիրում կայացած Մ23 տարեկանների «Արսեն Կոտիկյանի» անվան հուշամրցաշարում հաղթող ես դարձել։

- Այո, այս հաղթանակը շատ կարևոր էր, քանի որ սրանով ես հնարավորություն ստացա հոկտեմբերին հանդես գալ մեծահասակների կազմում։

- Շնորհակալություն, Գասպար, մեզ ժամանակ տրամադրելու համար։

- Զգացված եմ ուշադրության համար, անխափան գործունեություն Ձեր թերթին։

Պատրաստեց ՀՈՎՀԱՆՆԵՍ ՍԱՐԳՍՅԱՆԸ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝