«ԲՈԼՈՐ ԵՐԵՔ ՄՐՑԱԿԻՑՆԵՐՍ ԷԼ ՇԱՏ ՓՈՐՁԱՌՈՒ, ՏԻՏՂՈՍԱԿԻՐ ՄԱՐԶԻԿՆԵՐ ԷԻՆ».ԱՆՎԱՆԻ ՄԱՐԶԻԿ, ՄԱՐՏԱԿԱՆ ՍԱՄԲՈՅԻ ԵՎՐՈՊԱՅԻ ԿՐԿՆԱԿԻ ՉԵՄՊԻՈՆ, ՀԱՄԱՇԽԱՐՀԱՅԻՆ ԽԱՂԵՐԻ ՀԱՂԹՈՂ ԱՐՄԱՆ ԱՎԱՆԵՍՅԱՆ

Վերջերս Չինաստանի Չենգդու քաղաքում կայացած «Համաշխարհային խաղեր 2025» մրցաշարի մարտական սամբո մարզաձևում փայլուն է հանդես եկել ու ոսկե մեդալի արժանացել Արցախցի անվանի մարզիկ, Եվրոպայի կրկնակի չեմպիոն, Աշխարհի բրոնզե մեդալակիր, Աշխարհի գավաթի փոխչեմպիոն, միջազգային կարգի սպորտի վարպետ ԱՐՄԱՆ ԱՎԱՆԵՍՅԱՆԸ։ Նա արժանացել է նաև այս մրցաշարի «Լավագույն մարզիկ» կոչմանը։ Նշենք, որ սա մեր երկրի հավաքականի կողմից նվաճած միակ մեդալն է այս մրցաշարում։ Մեր երկիրը ներկայացել է 5 մարզիկով։

Iravunk. com -ի մարզական լրագրողը կապ է հաստատել ու զրուցել ԱՐՄԱՆ ԱՎԱՆԵՍՅԱՆԻ հետ։

- Ողջույն, Արման։Շնորհավորում ենք փայլուն հաղթանակի, ինչպես նաև լավագույն մարզիկ ճանաչվելու կապակցությամբ։ Ինչպես ստացվեց։ - Շնորհակալ եմ։ Հանդես եկա 98 կգ քաշային կարգում։ Երեք գոտեմարտ եմ անցկացրել։ Բոլոր երեք մրցակիցներս էլ շատ փորձառու, տիտղոսակիր մարզիկներ էին։ Մեկնարկային գոտեմարտի ժամանակ մրցակիցս ազգությամբ ուկրաինացի մարզիկն էր, նա Աշխարհի կրկնակի չեմպիոն է։ Նրան հաղթելուց հետո կիսաեզրափակչում պարտության մատնեցի Կամերունի ներկայացուցչին. նա ևս Աշխարհի կրկնակի չեմպիոն է, նրան պարտվել էի նախորդ մրցաշարերի ժամանակ։ Եզրափակչում էլ ռուս մրցակցիս եմ հաղթել, նա Եվրոպայի ու Աշխարհի գավաթի չեմպիոն է։ Այդպես արժանացա ոսկե մեդալի ու նաև ճանաչվեցի որպես լավագույն մարզիկ այս մրցաշարի։ - Արման, իսկ որ գոտեմարտն առավել բարդ տրվեց։

- Անկեղծ ասած, բոլոր երեք գոտեմարտերն էլ բարդ անցան, քանի որ երեք մրցակիցներս էլ շատ ուժեղ, տիտղոսակիր մարզիկներ էին, սակայն ես կարողացա առավել ուժեղ գտնվել նրանցից։ Նշեմ, որ այսպիսի մասշտաբով կազմակերպվող մրցաշարերին կարող են մասնակցել միայն վարկանիշային միավորներ վաստակած մարզիկները։ Սամբո մարզաձևը առաջին անգամ էր ընդգրկվել Համաշխարհային խաղերի ծրագրում, սա նշանակում է, որ շատ մեծ հույսեր կան, որ ՄՕԿ-ը կարող է մարզաձևն ընդգրկել, հաստատել Օլիմպիական խաղերի ծրագրում, և 2028 թվականին ԱՄՆ Լոս Անջելես քաղաքում կայանալիք Օլիմպիական խաղերին կկարողանանք մասնակցել։ Համաշխարհային խաղերը ևս կայանում են 4 տարին մեկ անգամ, ՕԽ -ի նման։ Հաջորդը կլինի 2029-ին։ - Իսկ կարող ես առանձնացնել քո հիշարժան նվաճումներից որևէ մեկը։

- Ճիշտն ասած, սպորտում ցանկացած նվաճում կարելի է առանձնացնել որպես փորձի ավելացման և նոր ձեռքբերման օրինակ։ Համաշխարհային խաղերից առաջ, հուլիսին ՌԴ Կրասնոդար քաղաքում կայացած «Սամբոյի Գրան Պրի» միջազգային մրցաշարում արծաթե մեդալ եմ նվաճել, բոլոր մրցակիցներս ռուս էին։ Ամենաբարդը կիսաեզրափակիչն էր, քանի որ ունքի պատռվածք էի ստացել, բայց կարողացա այդ վիճակում հաղթել մրցակցիս։

- Շնորհակալություն, Արման, մեզ ժամանակ տրամադրելու, հաճելի զրույցի համար։ Սպասենք արդեն հաջորդ հաղթանակիդ։

- Շատ զգացված եմ ուշադրության համար, անխափան գործունեություն Ձեր թերթին։

Պատրաստեց ՀՈՎՀԱՆՆԵՍ ՍԱՐԳՍՅԱՆԸ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝