«Ֆուտբոլի ֆեդերացիան պետք է վերահսկվի հատուկ մարմինների կողմից» . Ալբերտ Մովսիսյան

Հայաստան–Պորտուգալիա խաղի տոմսերի շուրջ ստեղծված մտահոգիչ իրավիճակն անտարբեր չի թողել հայ հասարակությանը, ինչպես նաեւ շատ քաղաքական գործիչների: Բանն այն է, որ տոմսերը վերավաճառվել է միաժամանակ մի քանի մարդկանց (3-5 հոգու)։ Հատկանշական է, որ տոմսերի գները արհեստականորեն բարձրացվել է 10 անգամ:
Այս իրավիճակին անդրադարձել է նաեւ Երեւանի ավագանու անդամ, «Արդար Խոսք» կուսակցության նախագահ ԱԼԲԵՐՏ ՄՈՎՍԻՍՅԱՆԸ, ում հետ էլ զրուցեց «Իրավունք»-ը:

— Սա առաջին դեպքը չէ, երբ նման խնդրի առաջ է կանգնում թե՛ ֆուտբոլասեր հասարակությունը եւ թե՛ այն մարդիկ, ովքեր փորձում են ճանաչված որեւիցե երգչի համերգի տոմս  ձեռք բերել: Վերջապես նմանատիպ խնդիրների լուծումն ինչպե՞ս եք տեսնում:

— Լուծումը պետք է տա համապատասխան մարմինը: Պետք է լինեն աչալուրջ՝ նմանատիպ բողոքների նկատմամբ, այսինքն՝ պետք է կատարվի խիստ վերահսկողություն, որպեսզի նմանօրինակ խնդիրներ չառաջանան: Չի բացառվում, որ այս ամենը եկել է ֆեդերացիայից եւ նրան կից այլ կառույցներից: Հետեւաբար, անգամ ֆեդերացիան պետք է վերահսկվի: Իմ կոչն է հետագայի համար նաեւ, որպեսզի ուշադրություն դարձնեն եւ քաղաքացիներին խնդրի առաջ չկանգնեցնեն: Ինչպես նաեւ տոմսերի առուվաճառքին պետք է հետեւեն եւ գները վերահսկվեն: Այն, ինչ մենք տեսանք Հայաստան-Պորտուգալիա խաղի ժամանակ, դա անընդունելի է առնվազն իմ համար:

— Այսինքն, հնարավո՞ր եք համարում, որ երբեւէ այս խնդիրը կստանա վերջնական լուծում՝ հօգուտ հանդիսատեսի:

— Իհարկե, հնարավոր է: Ցանկության դեպքում կարող են ամենը վերահսկել, եւ դա կարող է իրագործել ֆեդերացիան՝ վերահսկող մարմինների հետ միասին: Այս խնդրին կարող են ներգրավված լինել նաեւ ներքին գործերի նախարարության ներկայացուցիչները կամ այլ մարմիններ: Իսկ անտարբերության մատնելով՝ խնդիրները միշտ էլ շարունակելու են լինել, ինչպես տեսնում ենք հիմա:

ՆԱՆԱ ՍԱՐԳՍՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝