ՀԵՐԹԱԿԱՆ ՍԿԱՆԴԱԼԸ ՀԱՅԱՍՏԱՆ - ՊՈՐՏՈՒԳԱԼԻԱ ԽԱՂԻ ՇԵՄԻՆ

Սեպտեմբերի 6-ին, ժամը 20։00-ին, Հայաստանի Ֆուտբոլի ազգային հավաքականը Վազգեն Սարգսյանի անվան «Հանրապետական» մարզադաշտում կընդունի Պորտուգալիայի հավաքականին։ Սա Աշխարհի առաջնության ընտրական փուլի մրցաշար է լինելու։

Սպասվող խաղի մասին Iravunk. com -ի մարզական լրագրողը կապ է հաստատել ու զրուցել Ֆուտբոլի Հայաստանի ազգային հավաքականի երկրպագուների FAF շարժման հիմնադիր ՍԵՐԳԵՅ ՋԱՆՋՈՅԱՆԻ հետ։ Նա այսպես մեկնաբանեց.

- Երևանի Վազգեն Սարգսյանի անվան «Հանրապետական» մարզադաշտի խոտածածկույթը վնասվել է օգոստոսին կայացած Ջենիֆեր Լոպեսի համերգի ժամանակ։ Ակնհայտորեն «Հանրապետական» մարզադաշտը պատրաստ չէ ընդունել Պորտուգալիայի հավաքականի խաղը։ Դա է պատճառը ծայրահեղ քայլի դիմելու նախախաղային մարզումները այլ վայր են տեղափոխվել։ Դա արդեն ամոթալի թեմա է, անկեղծ ասած, չեմ հիշում, թե երբ է եղել նման կարգի խաղ, որ մարզադաշտում նախախաղային մարզում չկայանա, կամ ասուլիսն ու մարզումը տարբեր վայրերում կայանան։ Նախախաղային մարզման իմաստը այն է, որ ֆուտբոլիստները ճանաչեն, ադապտացվեն այն դաշտին, որտեղ խաղալու են։ Ու կարծում եմ ռեալ վտանգ կար, մարզումից հետո մրցակից թիմը բողոք ներկայացներ ՈՒԵՖԱ ֆուտբոլիստների վնասվածք ստանալու բարձր հավանականության հետ կապված։ Իսկ այդ դեպքում խաղը կարող էր տեղափոխվել կամ չկայանալ։ Ամեն դեպքում, ոչ մեկը չբացատրեց, պատասխանատվություն չկրեց «Հրազդանից» դեպի «Հանրապետական» համերգը տեղափոխելու մասով։ Հայաստանի և Պորտուգալիայի հավաքականները նախախաղային մարզումները կանցկացնեն Ավանի ֆուտբոլի ակադեմիայի մարզադաշտում։

- Սերգեյ, ինչ կարող ես ասել սպասվող բուն հանդիպման մասին։

- Աշխարհի առաջնության ընտրական փուլի մեկնարկն է։ Իհարկե, դրական լիցքեր կան Եղիշե Մելիքյանի գալով, սա առանցքային խաղ է լինելու։ Հայկական ֆուտբոլում թարմություն նկատվում է։ Սակայն մեր պահանջը ՀՖՖ նախագահ Արմեն Մելիքբեկյանի հրաժարականի մասին մնում է ուժի մեջ ու չի փոխվել։ Նրա, Ֆեդերացիայի ղեկին ամեն օր մնալով, այդքան ժամանակահատված կորցնում ենք վաղվա մասով, հետագայի մասով։ Երբ նոր ղեկավար ընտրվի, նա զրոյից պիտի սկսի ամեն ինչ, դժվար կլինի։

Պատրաստեց ՀՈՎՀԱՆՆԵՍ ՍԱՐԳՍՅԱՆԸ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝