Ստեղծվել է կենդանի բջիջներով գել՝ այրվածքների և վերքերի բուժման համար. Advanced Healthcare Materials

Լինչենպինգի համալսարանի գիտնականները մշակել են հեղափոխական բժշկական նորամուծություն՝ կենդանի բջիջներով հագեցած յուրահատուկ գել, որը նրանք անվանել են «մաշկ ներարկիչի մեջ»։ Այս նորարարական միջոցը նախատեսված է այրվածքների բուժման ժամանակ մաշկի փոխպատվաստման համար և խոստանում է փոխել վերքերի բուժման մոտեցումը։ Գիտական աշխատանքի արդյունքները հրապարակվել են հեղինակավոր Advanced Healthcare Materials (AHM) բժշկագիտական հանդեսում։

Այրվածքների դեպքում բժշկությունը սովորաբար փոխպատվաստում է մաշկի միայն վերին շերտը՝ էպիդերմիսը։ Սակայն այս մեթոդը հաճախ հանգեցնում է կոպիտ և գեղագիտական տեսանկյունից անցանկալի սպիների առաջացման։ Պատճառը պարզ է՝ վերականգնվող մաշկում բացակայում է խորքային և բարդ կառուցվածք ունեցող դերմիսը։ Իսկ հենց դերմիսն է ապահովում մաշկի առաձգականությունն ու բնական ֆունկցիոնալությունը, քանի որ պարունակում է արյան անոթների, նյարդերի և մազի ֆոլիկուլների բարդ ցանց։

Դերմիսը լաբորատոր պայմաններում ստեղծելը մշտապես եղել է բարդ և աշխատատար խնդիր, քանի որ այն բաղկացած է բազմազան և իրար հետ սերտ կապված կառուցվածքային տարրերից։ Լինչենպինգի գիտնականները առաջարկել են նորարարական լուծում․ փոխպատվաստել ոչ թե ամբողջական դերմիս, այլ նրա «շինարարական բլոկները»՝ շարակցական հյուսվածքի բջիջներ, այսինքն՝ ֆիբրոբլաստներ։ Այս բջիջները հեշտությամբ աճեցվում են լաբորատորիայում և օրգանիզմում կարող են վերափոխվել տարբեր տեսակի բջիջների՝ կախված հյուսվածքների վերականգնման պահանջներից։

Այս նպատակով գիտնականները ֆիբրոբլաստները տեղավորել են մանրակրկիտ մշակված ժելատինե միկրոգնդիկների վրա, որոնք կազմով և կառուցվածքով հիշեցնում են մաշկի բնական կոլագենը։ Այնուհետև գնդիկներով հարուստ բջիջային խառնուրդը միացրել են հիալուրոնաթթվի հետ և քիմիական ռեակցիայի միջոցով ստացել են միատարր, դիմացկուն և հեշտ քսվող գել։ Այս նյութը, իր կառուցվածքով և կիրառման եղանակով, գիտնականները բնորոշել են որպես «մաշկ ներարկիչի մեջ»։

Հետազոտական փորձարկումների ժամանակ 3D տպիչով ստեղծված գելի փոքրիկ թիթեղները տեղադրվել են մկների մաշկի տակ։ Արդյունքները տպավորիչ էին․ բջիջները հաջողությամբ գոյատևեցին, սկսեցին արտադրել դերմիսի կառուցման համար անհրաժեշտ նյութեր, իսկ փոխպատվաստված հատվածներում ձևավորվեցին նոր արյան անոթներ։ Սա կարևորագույն քայլ է՝ ապահովելու փոխպատվաստված հյուսվածքների կենսունակությունը և բնական ինտեգրումը օրգանիզմում։

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝