Բժիշկը բացատրում է, թե ինչ է առաջացնում ջրի անհավասարակշռությունը ամռանը

«Նախևառաջ, ամառային շոգին բարձր ջերմաստիճանը հանգեցնում է արյան անոթների լայնացման․ այս վիճակում արյան շրջանառությունը դանդաղում է, և հեղուկը սկսում է կուտակվել հյուսվածքներում։ Մարմինը, փորձելով սառչել, ակտիվացնում է քրտնարտադրությունը։ Սակայն, եթե խմելու ռեժիմը խախտվում է՝ հեղուկը օգտագործվում է կամ չափազանց քիչ, կամ չափազանց շատ, դա բերում է այտուցների առաջացման», – նշել է բժիշկ Ամոսովան։

Նա խորհուրդ է տալիս հեղուկ ընդունել հաճախ, բայց փոքր բաժիններով՝ նախընտրելով սենյակային ջերմաստիճանի ջուր։ Բացի ջրից, օգտակար են նաև կանաչ թեյը, չքաղցրացված մրգային ըմպելիքները, ինչպես նաև վարունգով, կիտրոնով, ձմերուկով, նեխուրով, մաղադանոսով կամ կոճապղպեղով համեմված ջուրը։ Այս ըմպելիքները, չափավոր օգտագործման դեպքում, օգնում են օրգանիզմից հեռացնել ավելորդ հեղուկը։

Բժշկի խոսքով՝ այտուցի առաջացման մեկ այլ պատճառ կարող է լինել աղի սննդի, ալկոհոլի և քաղցր ըմպելիքների (այդ թվում՝ փաթեթավորված հյութերի) հաճախակի օգտագործումը․ դրանք նպաստում են ջրի պահպանումին օրգանիզմում։

Կոսմետոլոգը հավելել է, որ շոգ եղանակին այտուցները սովորաբար հայտնվում են այն հատվածներում, որտեղ հեղուկը հեշտությամբ է կուտակվում ձգողականության և շրջանառության առանձնահատկությունների պատճառով։ Ամենահաճախ հանդիպող գոտիներն են ոտքերը՝ հատկապես կոճերն ու ոտնաթաթերը, և դեմքը՝ այդ թվում աչքերի տակի նուրբ հատվածը։ Ձեռքերի այտուցները հանդիպում են հազվադեպ, սակայն հնարավոր են հատկապես այն մարդկանց մոտ, ովքեր երկար ժամանակ աշխատում են համակարգչի առջև կամ կրում են սեղմող զարդեր, որոնք խանգարում են արյան շրջանառությանը։

Ամոսովան ընդգծել է, որ որոշ հիվանդություններ կարող են ավելի ուժեղացնել այտուցները՝ դրանց թվում են երակների լայնացումը և քրոնիկ երակային անբավարարությունը, սրտային խնդիրները, երիկամների հիվանդությունները, լիմֆեդեման և հորմոնալ խանգարումները։

Նա նաև պարզաբանել է, թե ինչպես կարելի է տարբերել սովորական այտուցը լուրջ խնդիրների մասին ազդարարողից․ եթե այտուցը համաչափ չէ և առաջացել է միայն մեկ հատվածում, օրինակ՝ մեկ ոտքում, հարկավոր է զգուշանալ։ Նմանապես անհանգստացնող են այտուցները, որոնք չեն անցնում 24 ժամվա ընթացքում, տարածվում են դեմքին ու ձեռքերին կամ ուղեկցվում են քաշի կտրուկ ավելացմամբ։

Բժշկի խոսքով՝ միկրոշրջանառությունը բարելավելու և հեղուկի լճացումը կանխելու համար կարելի է կիրառել լիմֆոդրենաժային ազդեցություն ունեցող քսուքներ, գելեր և դիմակներ, որոնք պարունակում են կոֆեին, տրոքսերուտին, մենթոլ կամ մենթիլ լակտատ, ինչպես նաև ձիու շագանակի քաղվածք։ Լավ արդյունք են տալիս նաև լիմֆոդրենաժային ինքնամերսումը և կոնտրաստային լվացումները։

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝