Ի՞նչ հույսով է Մեխակյանն ուզում մտնել ընտրապայքարի մեջ. ԶԱՐՄԱՆՔ

Նիկոլ Փաշինյանի զուգընկեր ԱՆՆԱ ՀԱԿՈԲՅԱՆԸ շարունակում է զարմացնել իր խայտառակ բառապաշարով, որը բոլորովին հարիր չէ իր կարգավիճակին: Անդրադառնալով իր հետ ընթրիքի մասնակցած գործարար Գաբրիել Ջեմբերջյանի եւ լրագրող Սյուզի Բադոյանի միջեւ ծագած միջադեպին՝ ո՛չ ավել, ո՛չ պակաս լրագրողին անվանել է «հիստերիկ»: «Չգիտեմ ով ես, ինչ ես, բայց այս մարդը եւ մյուս բոլոր նվիրատուները, որ մասնակցում են «Իմ քայլը» հիմնադրամի բարեգործական ընթրիքներին կամ նվիրատվություն են անում հիմնադրամին, դա անում են, որպեսզի հարյուրավոր մարդիկ օգտվեն հիմնադրամի ծրագրերից ու քեզ նման՝ իրենք էլ աշխատանք ունենան։ Բայց նրանք, ի տարբերություն քեզ՝ սողացող տգետիդ, աշխատանքի դիմաց ստիպված չեն լինի ծառայություն մատուցել իրենց աշխատանքով ապահովողին եւ մարդկանց ինֆարկտի հասցնել տխմարագույն հարցերով ու պնդումներով», - գրել էնա։ Վերջում էլ լրագրողին անվանել «Ագրեսիվ ոջիլ»: Համաձայնեք, որ մակարդակը վաղուց լքել է այս ընտանիքին:

Էջմիածնի նախկին քաղաքապետ Դիանա Գասպարյանի հրաժարականից հետո՝ Վաղարշապատ խոշորացված համայնքի ղեկավարի պաշտոնի համար արդեն իսկ հայտ է ներկայացրել Արմավիրի մարզպետ ԱՐԳԻՇՏԻ ՄԵԽԱԿՅԱՆԸ: Այլ կերպ ասած՝ հիմա էլ նա է ՔՊ-ի քաղաքապետի սրտի թեկնածուն: Բայց, զարմանալի է՝ ի՞նչ հույսով է Մեխակյանն ուզում մտնել ընտրապայքարի մեջ՝ այն էլ Սուրբ քաղաքի ղեկին նստելու համար, երբ անգամ Սուրբ Էջմիածնի տոնին մի շնորհավորանք չհայտնեց, էլ չենք ասում հազարավոր հավատավոր ժողովրդի հետ Մայր Աթոռ այցելեր: Մինչդեռ  բուժաշխատողի օրվա առթիվ նա հանդես էր եկել շնորհավորական ուղերձով: Լավ, դեռ սա էլ մի կողմ, իսկ էջմիածնեցիները ձայն կտա՞ն Մայր Աթոռի դեմ այս օրերին լկտի արշավանք սկսած փաշինյանական իշխանության որեւէ ներկայացուցչի: Չէ որ եթե նրանք լուռ են, ուրեմն՝ համաձայն են իշխանական այս գործելակերպի հետ:

Զարմանալի կերպ են իրենց պահում նաեւ որոշ ընդդիմադիրներ: Ըստ Լեհաստանում ՀՀ նախկին դեսպան, ընդդիմադիր քաղաքական գործիչ Էդգար Ղազարյանի, «Հայաստան» խմբակցության պատգամավոր ԱՐԵԳՆԱԶ ՄԱՆՈՒԿՅԱՆԸ, որը երեկ ԱԺ Մարդու իրավունքների պաշտպանության եւ հանրային հարցերի մշտական հանձնաժողովի անունից անցկացնում էր քաղաքացիների ընդունելություն, խուսափել է լրագրողների ներկայությամբ հանդիպել իրեն՝ Նիկոլ Փաշինյանի իմպիչմենտին միանալու հարցը քննարկելու համար: «Դե ամաչելու բան ունի, բնականաբար, պետք է խուսափի: Հարցը միայն այն է, թե դեռ որքա՞ն են լրագրողներից թռած ման գալու Քոչարյանի պատգամավորները: Սա երկար չի կարող ձգվել, որովհետեւ թռածների հետեւից գալու ենք մենք…», - գրել է նախկին քաղբանատրկյալ Նարեկ Մալյանը:

Թերեւս ամեն ինչ լավ է միայն Երեւանի քաղաքային իշխանության կյանքում: Մինչ իսկական քաոսի տպավորություն են թողնում մայրաքաղաքի անվերջանալի խցանումները, 160.000 դրամանոց կայանատեղիներ, որոնցում տեղ չկա անգամ քաղաքապետին սպասարկող վարորդի համար, քաղաքի փոշին ու կեղտը, հսկա փոսերը, տրանսպորտ, որը ժամերով չի հասնում կանգառ, իսկ հասնելիս էլ հարց է՝ մի ոտքով գոնե կանգնելու տեղ կլինի՞, թե՝ ոչ, պարզվում է՝ Երեւանի քաղաքապետ ՏԻԳՐԱՆ ԱՎԻՆՅԱՆԻ թեթեւ ձեռքով՝ իրենք իրենց 2025թ-ին իրենք պարգեւատրել են 714 մլն դրամով։ Այս մասին նշել է Երեւանի ավագանու ընդդիմադիր անդամ Գեւորգ Ստեփանյանն ու ընդգծել. «Երեւանը որբի գլուխ դարձրածներն ու սեփական գրպանները լցնողներից օր առաջ պետք է ազատենք՝ միասին»։

ԶԱՐՄԱՑԱԾ Է «ԻՐԱՎՈՒՆՔ»-Ը

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝