Ադրբեջանցի պատգամավորը սպառնացել է ռուս քաղաքական գործիչներին

Ադրբեջանի Միլլի Մեջլիսի պատգամավոր Ռասիմ Մուսաբեկովը մեկնաբանել է Ռուսաստանի Պետդումայի պատգամավոր Անդրեյ Գուրուլևի սպառնալիքները՝ Ադրբեջանի դեմ նոր հատուկ ռազմական գործողություն սկսելու վերաբերյալ: Մուսաբեկովն իր մեկնաբանությունը տվել է ադրբեջանական Baku TV հեռուստաալիքին տված հարցազրույցում։

«Այն փաստը, որ Գուրուլևը դարձել է Պետդումայի պատգամավոր, նրա խելքը դրանից չի ավելացել», - ասել է Մուսաբեկովը: 

Ադրբեջանցի պատգամավորի խոսքով՝ Կովկասի աշխարհագրական պայմանները գործնականում անհնար են դարձնում Ադրբեջանի դեմ հնարավոր ռազմական գործողությունները։ «Բացեք քարտեզը և նայեք. Ռուսաստանի և Ադրբեջանի միջև սահմանն անցնում է Մեծ Կովկասյան լեռնաշղթայով։ Ինչպե՞ս եք այնտեղ անցկացնելու որևէ տեսակի ռազմական գործողություն։ Կամ դեսանտային գործողություն Ադրբեջանի ափին։ Ձեզանից միայն մնացորդներ կմնան», - ընդգծեց նա։

Մուսաբեկովը նաև նշել է, թե ադրբեջանական բանակը զգալիորեն գերազանցում է Կովկասում գտնվող ռուսական զորքերին և «ունակ է արդյունավետորեն պաշտպանել երկիրը»։ «Ադրբեջանական բանակը պրոֆեսիոնալ ուժ է, այլ ոչ թե բանտային հանցագործների խումբ, ինչպես որոշ ռուսական ստորաբաժանումներում», - ասել է նա։

Ինչ վերաբերում է տնտեսական պատժամիջոցներին և առևտրային սահմանափակումներին, Մուսաբեյկովը վստահ է, որ Ռուսաստանը դրանից ոչինչ չի շահի։

Եզրափակելով՝ ադրբեջանցի պատգամավորը կոչ է արել ռուս քաղաքական գործիչներին զերծ մնալ սպառնալիքներից և սադրանքներից․ «Եթե նման հայտարարությունները շարունակվեն, Ադրբեջանի և Ռուսաստանի միջև հարաբերությունները կհասցվեն նվազագույնի»։

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝